भारतीय गायक हनी सिंह नेपाल आइपुगेका छन्।
उनी चैत २५ गते बौद्धस्थित होटल ह्यात रिजेन्सीको सांगीतिक कार्यक्रममा सहभागी हुन काठमाडौं आएका हुन्। यो कार्यक्रम युनिफाइ नेपालको आयोजनामा हुन लागेको हो।
उनले पहिलोपटक नेपालमा कार्यक्रम गर्न पाउँदा खुसी भएको बताए। ‘धेरै समयदेखि नेपालमा कार्यक्रम गर्ने योजना रहे पनि यसपटक सफल भएको छ,’ त्रिभुवन विमानस्थलमा आयोजकसँगै कुरा गर्दै उनले भने, ‘भोलि हुने कार्यक्रमका लागि एकदमै उत्साहित छु।’
कार्यक्रमको टिकट मूल्य १५ सय, २५ र ६ हजार रूपैयाँ रहेको छ। ६ हजारको टिकटमा कम्प्लिमेन्ट्री स्वरूप गिफ्ट उपलब्ध हुनेछ।
कार्यक्रमको पूर्ण रूपमा तयारी भइसकेको युनिफाई नेपालका रविन श्रेष्ठले जानकारी दिए।
‘साधारण टिकटको १ हजार ५ सयमाथि र भिआइपी टिकटको ६ हजार रूपैयाँसम्म रहेको छ। अधिकांश टिकट बिक्री भइसकेका छन्। केही टिकट कार्यक्रमस्थलमा पनि खरिद गर्न सकिनेछ,’ उनले भने।
कार्यक्रममा हनी सिंहसँगै नेपाली कलाकार डोङ द ग्रेट, यबेश थापा र विवेक लामाको प्रस्तुति रहनेछ।
सिंहका ‘ब्लु आइज, धिरे धिरे र चार बोतल भोडका’ लगायतका गीतहरू चर्चित छन्।
