मिस चबिको उपाधि तामाङलाई

सेतोपाटी संवाददाता

पोखरा, असोज १०

नेपालमै पहिलो पटक आयोजना भएको मिस चबी २०१७ को उपाधि रशना लामा तामाङले जितेकी छन्।

होल्डिङ ह्याण्डस् फेसन होम्सले आयोजना गरेको कार्यक्रममा करिब एक महिना लामो प्रशिक्षणपछि अन्य १५ जना प्रतियोगीहरुलाई पछि पार्दै तामाङले उपाधि जितेकी हुन्।

फर्स्ट रनरअप सोनिका गुरूङ र सेकेण्ड रनरअपमा बिन्दु कुँवरले उपाधि हात पार्न सफल भए। त्यसैगरी भ्युअर च्वाइसको उपाधि सलिना राना मगरले जितिन्।

विजेताहरूलाई नगद पुरस्कार र अवार्डले सम्मान गरिएको थियो।

फरक किसिमको सौन्दर्य प्रतियोगिता अनि आफूलाई मोटो छु भनेर आफ्नो प्रतिभा प्रस्फुटन गराउनबाट डराईरहेका युवतीहरुको लागि राष्ट्रिय तथा अन्तराष्ट्रिय स्तरको मन्चमा प्रतिश्पर्धा गराउने उद्धेश्यले आयोजना गरिएको मिस चबी २०१७ फरक प्रकारको सौन्दर्य प्रतियोगिता रहेको होल्डिङ ह्याण्डस् फेसन होम्सका अशोक गुरूङले जानकारी दिए।

सौन्दर्य प्रतियोगितामा क्षमता भएर पनि सधै पछि परेका अनि आफ्नो मोटोपनले गर्दा आफुलाई एक्सपोज गर्न डराईरहेका युवतीलाई उनीहरुको क्षमतालाई अभिबृदी गर्दै समाजमा सकारात्मक सन्देश फैलाउने उद्धेश्यले यस प्रतियोगिता गरिएको उनले बताए।

कार्यक्रममा आयोजक अशोक गुरूङले आफूले पहिलो पटक आयोजना गरेको कार्यक्रम सफल भएको भन्दै अब छिट्टै मिसेस चबी पनि आयोजना गर्ने जानकारी दिए।

प्रतियोगिताका लागि छनौट हुने चुबी सुन्दरीहरुलाई एक महिना सम्म विशेष प्रशिक्षण प्रदान गरिएको थियो। जसमा नेपालका ख्याति प्राप्त ट्रेनर बाट प्रतिस्पर्धिहरुलाई सञ्चार दक्षता, एमसिइङ, पब्लिक स्पिकिङ, व्यक्तित्व विकासको कक्षा,आत्मविश्वास अभिवृद्धि गराउने कक्षा, मोटिभेसन क्लास तथा व्यक्तित्व विकास सम्बन्धि विषयमा प्रशिक्षण दिएका थिए।

प्रशिक्षणको क्रममा प्रतिस्पर्धिहरुलाई फिटनेस, योगा, स्पा सहित गतिविधीमा समेत सहभागि गराइएको आयोजकले जानकारी दिएको छ।