'कमेडी अफ एरर्स'का लागि जानिएको चर्चित बलिउड कमेडी फ्रान्चाइज 'हेराफेरी'को तेस्रो श्रृखंला बन्ने पक्का भएको छ।
तेश्रो श्रृखंलामा पनि पहिलो श्रृखंलादेखि निरन्तर रहेका अक्षय कुमार, सुनिल शेट्टी तथा परेश रावलले अभिनय गर्नेछन्।
मुम्बई मिररले फिल्मसँग निकट रहेका श्रोतको हवाला दिंदै लेखेको समाचारमा गत महिना फिल्म बनाउने पक्का भएको समाचार छापेको छ।
समाचारका अनुसार फिल्मको सुटिङ डिसेम्बर र फेब्रुवरीको बिचमा गरिनेछ।
त्यस्तै निर्माण पक्षले फिल्मलाई अर्को वर्षको मध्यसम्म रिलिज गर्ने योजना बनाएको पनि समाचारमा उल्लेख छ।
फिल्मलाई 'धमाल' सिरिजका निर्देशक इन्दर कुमारले निर्देशन गर्नेछन्। बुधबार उनले फिल्म निर्देशन गर्न लागेको ट्वीटसमेत गरेका छन्।
फिल्मको पहिलो श्रृंखलालाई प्रियदर्शनले निर्देशन गरेका थिए भने दोश्रो श्रृखंलालाई निरज बोराले निर्देशन गरेका थिए।
पहिलो फिल्मले सुरूमा वक्सअफिसमा गतिलो सुरूवात लिन सकेको थिएन। फिल्मले विस्तारै दर्शक जम्मा गरेर हिट भएको थियो भने दोस्रो फिल्मले पहिलो फिल्म जत्तिको सफलतालाई पछ्याउन सकेन।
फिल्ममा कथा भने बोराको नै हुने बताइएको छ। २०१४ मा फिल्मको कथा लेखिसकेका बोराको सन् २०१७ मा निधन भइसकेको छ।
