बलिउड अभिनेता आमिर खानले फिल्म लेखकको पारिश्रमिक बढाउनुपर्ने बताएका छन्। लेखन फिल्मको आधारभूत हिस्सा रहेकाले उनीहरूलाई दिइने पैसा बढाउनुपर्ने बताएका हुन्।
सिनेस्तान इन्डियाले आयोजना गरेको स्क्रिप्ट प्रतियोगिताको अवार्ड वितरण समारोहमा उनले सो धारणा राखेका हुन्।
'म अन्जुम(राजाबली) यस्तो प्रतियोगिता आयोजना गर्नमा उत्साहित रहेको थाहा पाउँदा खुशी छु। भारत ठूलो देश हो र यहाँ यस्ता मानिसहरू छन् जो नयाँ कथा भन्न चाहन्छन् तर मौका पाइरहेका छैनन्। त्यसकारण त्यस्ता मानिसहरूका लागि कथा पठाउने यो राम्रो ठाउँ हो', आमिरले भने।
त्यस्तै फिल्म उद्योगलाई भिन्न दृष्टिकोण राख्ने ताजा लेखकहरूको आवश्यक्ता रहेको पनि बताए। उनले लेखकलाई प्रशस्त पारिश्रमिक दिनुपर्नेमा जोड दिए। यसले लेखकहरूलाई नयाँ सोचका साथ अगाडी आउन प्रोत्साहित गर्ने उनको भनाइ थियो।
'हामीले यस्तो प्रतियोगितामा मात्र नभई फिल्म उद्योगमा पनि लेखकलाई अझ बढि पैसा दिनुपर्छ', उनले भने ' म स्क्रिप्टको आधारमा फिल्म छनौट गर्छु, लेखक फिल्म निर्माण प्रक्रियाका महत्वपूर्ण अंग हो किनकी कथा फिल्मको गर्भ हो। फिल्म लेखक सम्पूर्ण प्रक्रियाको आधारभूत मानिस हो', आमिरले थपे।
आमिरले लेखक र निर्मातासँग मिलेर फिल्मको कमाइमा लेखकलाई पनि पैसा आउने मोडल बनाउने कोशिस गरिरहेको बताउँदै भने, 'फिल्म निर्देशकको माध्यम हो, त्यसमा शंका छैन् जहाँ कलाकार र प्राविधिकको टिमवर्क रहन्छ। तर, कथा लेखकले जन्माउने भएकाले उनीहरूको स्थान उद्योगमा माथि हुनुपर्छ। त्यस सवालमा हामीले धेरै छलफल गरिसकेका छौ र एउटा नमुना बनाउने प्रयास गरिरहेका छौं।'
यसैगरी सो प्रतियोगितामा सर्वोत्कृष्ट अवार्ड दिदैं आमिरले अगाडी भने ' राम्रो स्क्रिप्टबिना, राम्रो फिल्म बन्दैन। हाम्रो देशमा थुप्रै राम्रा र लायकका लेखक छन् जसले आफ्नो क्षमता देखाउने सहि ठाउँ पाइरहेका छैनन्।'
