शाहरूख खान, अनुष्का शर्मा तथा क्याटरिना कैफको मूख्य भूमिका रहेको फिल्म 'जिरो' शुक्रबारबाट प्रदर्शनमा आएको छ। यसमा शाहरूखका साथीको भूमिकामा देखिएका अभिनेता मोहम्मद जिसान अयूबले केही समय ठूला बजेटका सिनेमाबाट टाढै बस्ने बताएका छन्।
'केही समयका लागि ठूला बजेटका सिनेमा गर्दिनँ। यी सिनेमाको समस्या के हो भने समीक्षकहरूले तथाकथित 'ए-लिस्टर' कलाकारको मात्रै कुरा गर्छन्', उनले भने, 'त्यसकारण तपाईंले कस्तो काम गर्नुभयो भनेर न समीक्षकबाट थाहा पाउनुहुन्छ, न दर्शकबाट।'
जिसानले 'नो वान किल्ड जेशिका'बाट बलिउडमा डेब्यू गरेका थिए।
'म पटकथामा महत्वपूर्ण हुने चरित्रहरू गर्न चाहन्छु। केही वेब सिरिज गर्ने बारे पनि सोचिरहेको छु। हेरौं के हुन्छ? म आफैंलाई थप परीक्षण गर्न चाहन्छु। सायद म सुरक्षित क्षेत्र खोज्दै थिएँ यतिबेलासम्म। अहिले घर राम्ररी चलिरहेको छ। र, यो नै खतरा मोल्ने समय हो', उनले थपे।
उनी अभिनित 'मणिकर्णिका' रिलिजको क्रममा छ।
उनले 'जिरो'मा समस्या रहेको पनि स्वीकारेका छन्।
'म 'जिरो' महान् सिनेमा हो भन्दिनँ। मेरो विचारमा मानिसहरूलाई सिनेमा नराम्रो लागेको र त्यसमा समस्या छ भन्ने छुट छ। हामी सबैलाई थाहा छ सिनेमामा कहाँ के कम थियो। तर यसले मिश्रित प्रतिक्रिया पाइरहेको छ। केहीले असाध्यै मनपराएका छन् भने केहीले पूरै सिनेमा हेर्न नसकेका पनि छन्।'
यस्तै उनले 'जिरो'को पहिलो र दोस्रो हाफ दुबै मनपराउने र मननपराउनेहरू रहेको पनि बताए।
उनले भने, 'कसैले पहिलो हाफ गतिलो छ भन्दै दोश्रो हाफ सुस्त रहेको बताइरहेका छन् भने केहीले दोश्रो हाफमा संवेदना भएको र पहिलो हाफमा हाँसो मात्रै भएको बताइरहेका छन्। म उनीहरूसँग सहमत हुन नसकुँला। तर उनीहरूले जे चाहेको हो त्यही भनिरहेका छन्। मेरो सोचाइमा त्यो राम्रो कुरा हो।'
उनको नजरमा भने 'जिरो' फरक सिनेमा हो।
'हामीले यस्तो सिनेमा बनाउने प्रयास भारतमा गरेका छैनौं। हुनसक्छ, कथा हामीले थुप्रै पटक सुनेका छौं। कथामा नयाँ त केही छैन तर प्रस्तुतिमा भने नयाँ प्रयास गरिएको छ', उनले भने।
