सन् २०१८ बलिउडका ए लिस्टर खानहरूका लागि बिर्सनयोग्य बन्यो।
सलमान खान 'रेस ३' र 'ट्यूबलाइट'बाट, आमिर खान 'ठग्स अफ हिन्दोस्तान'बाट पछारिँदा वर्षको अन्त्यमा शाहरुख खानको 'जिरो' पनि चम्कन सकेन। दर्शक र समिक्षक दुबैले उनीहरूका सिनेमा अपेक्षा गरिए अनुरूप मनपराएनन्। जबकि गत वर्षसम्म उनीहरूलाई वक्स अफिसको राजा ठानिँदै आइएको थियो।
बलिउडमा यी ठूला स्टारको सिनेमा पछारिँदा नसोचिएका साना बजेटका 'राजी', स्त्री, बधाई हो बधाई, अन्धाधुन' जस्ता सिनेमाले सबैलाई छक्क पार्ने प्रदर्शन गरे। समिक्षक दर्शक दुबैले सिनेमा मनपराए र वक्स अफिसमा पनि बलियो सावित भए।
यी सिनेमाका मुख्य कलाकारहरू राजकुमार राव, आयुष्मान खुर्राना, विक्की कौशल जस्ता अभिनेताको अभिनय दर्शकको नजरमा पर्यो। बलिउडको यो किसिमको उतारचढावले अहिले 'के खानहरूले आफ्नो जादु गुमेको हो?' भन्ने प्रश्न बलिउड वृत्तमा चल्न थालेको छ।
यस बारेमा बलिउडका चर्चित निर्देशक विधुविनोद चोपडाले आफ्नो धारणा दिएका छन्।
'एक लड्कीको देखा तो ऐसा लगा' सिनेमाको तयारीमा रहेका चोपडाले मिडियासँग कुराकानी गर्दै भने, 'पहिलो कुरा भनेको स्टारलाई बिर्सेर स्क्रिप्ट लेखिनुपर्छ। जब तपाईंले म यो स्टारका लागि लेख्छु भनेर सोच्नुहुन्छ तपाईं सम्झौता गर्न थालिसक्नुहुन्छ र यो कुरा मलाई गलत लाग्छ। किनकी यसमा स्क्रिप्ट हैन अनुहार प्राथमिक्तामा पर्छ। स्क्रिप्ट स्टारको सवारी हुँदा बल्ल त्यो स्क्रिप्ट स्क्रिप्ट हुन्छ।'
यस्तै चोपडाले पहिला स्क्रिप्ट लेखेपछि मात्र कलाकारको खोजी गरिनुपर्ने बताए।
'मैले 'एक लड्कीको देखा तो ऐसा लगा' सिनेमा अनिल कपुरलाई लेखेको होइन। मैले पहिला सिनेमा लेखें अनि अनिल उपयूक्त हुन् भनेर मात्र उनलाई बोलाएं। मेरो सोचाइमा तथाकथित स्टारहरूले स्क्रिप्ट पहिला आउँछ अनि अरू कुरा आउँछ भनेर बुझ्न जरूरी छ।'
यसैगरी उनले 'दंगल'ताका आमिर खानलाई यसबारेमा सचेत गराएको प्रसंगसमेत उप्काए।
'मैले यो कुरा 'दंगल'को सफलता पार्टीमा भनेको थिएँ। कसैले आमिर १,२,३,४,५ नम्बर हुन भन्यो। त्यो सुनेपछि मलाई कस्तो १,२,३,४,५ नम्बर भन्ने भयो। स्क्रिप्टका कारण सिनेमाले राम्रो गरेको हो। ऋतिक भएको भए पनि त्यो सिनेमाले राम्रो गर्थ्यो। लापरवाही तरिकाले बनाएको भए त्यो कुनै पनि हालतमा पनि चल्दैन थियो।
त्यो सुनेपछि मलाई आमिरले 'मेरो पार्टीमा मेरै खुट्टा तान्दैछौ साथी' जस्तो कुरा गरे।
अहिले हेर्नुस् के भयो? आमिरलाई सोध्नुस तपाईं। मैले त्यो दिन भनेको कुरा सत्य थियो, होइन र?'
