बलिउड अभिनेता सलमान खान ५० वर्ष कटिसके। उनी जहाँ गए पनि सबैजसोले एउटै प्रश्न गर्छन्- तपाईंको बिहे कहिले?
विभिन्न अभिनेत्री तथा मोडलहरूसँग उनको प्रेम चर्चा चुलिए पनि उनको बिहेबारे अनुमान लाउन मुश्किलै छ।
हालै सलमानले दिएको अन्तर्वार्तामा उनले आफ्नो बिहेबारे बोल्दै फ्यानहरूलाई अचम्ममा पारेका छन्। उनले अहिलेसम्म आफूलाई कसैले पनि बिहेको प्रस्ताव नराखेको बताएका छन्।
फिल्मफेयरका निम्ति दिएको अन्तर्वार्तामा उनले फिल्म 'भारत'मा कटरिना कैफले आफूलाई बिहेको प्रस्ताव राखे पनि वास्तविक जीवनमा आफूले यो अनुभव कहिल्यै नगरेको बताएका हुन्।
उनले भनेका छन्, 'यस्तो कहिल्यै भएकै छैन। मलाई लाग्छ मेराे बानीका कारण हो। म क्यान्डल लाइट डिनरमा जाने कुरामा विश्वासै राख्दिनँ। किनकि, त्यो प्रकाशमा म के खाँदैछु भन्ने कुरा देख्न सक्दिनँ। तर मलाई अहिलेसम्म कसैले बिहेको प्रस्ताव नराखेकोमा दुःख भने लागेको छ।'
सलमान पछिल्लो समय गायिका लुलिया भन्तुरसँग प्रेम सम्बन्धमा रहेको चर्चा छ। उनीहरू धेरैपटक सँगै देखिएका पनि छन्। तर सलमानले यसबारे पुष्टि गरेका छैनन्। लुलियाभन्दा अघि उनी कटरिनासँग सम्बन्धमा थिए।
सोही अन्तर्वार्तामा सलमानले आफ्नो फिल्म 'भारत'मा कटरिनाको भूमिकाबारे पनि बोलेका थिए।
उनका अनुसार भारत फिल्मका निम्ति कटरिना पहिलो रोजाइ हुन्। तर पछि प्रियंका चोपडाले निर्देशक अलीअब्बास जफर र सह-निर्माता तथा सलमानकी बहिनी अल्भिरा अग्निहोत्रीसँग सम्पर्क गरेर फिल्ममा खेल्ने इच्छा रहेको बताइन्। तर सुटिङ सुरू हुनु पाँच दिनअघि प्रियंका पछि सरिन्। प्रियंकाको त्यो बेला अमेरिकी गायक निक जोनाससँग बिहे हुने भएको थियो।
'काम सुरू हुनु पाँच दिनअघि प्रियंकाले फोन गरेर आफ्नो बिहे हुन लागेको बताइन्,' सलमानले भने, 'मैले बिहेका तीन-चार दिनमा व्यवस्थापन गरौंला पनि भनेको थिएँ। उनले लुगा-कपडाको बन्दोबस्त गर्नुपर्ने बताइन्। मैले डिजाइनरले ती सबै काम गरिदिने पनि भनेँ। अनि उनले खासमा आफ्नो बिहेको मिति कहिले हो भन्ने निश्चित नभएको बताइन्। उनले जे खोजेकी थिइन्, उनले पाइन्। कटरिनाले पनि जे चाहेकी थिइन्, त्यो उनले पाइन्।'
सलमान र कटरिनाको मुख्य भूमिका रहेको फिल्म भारतले राम्रा-नराम्रा दुवै खाले प्रतिक्रिया पायो। विश्वव्यापी बजारबाट हालसम्म फिल्मले तीन सय करोड भारू कमाइसकेको छ। सलमानकाे अर्को नयाँ फिल्म 'दबङ-३' आउँदैछ।
(हिन्दुस्तान टाइम्स)
