बलिउड अभिनेता अमिताभ बच्चनले आफ्ना फ्यानहरू समक्ष माफी मागेका छन्।
हरेक आइतबार अमिताभ बच्चन आफ्नो निवास बाहिर फ्यानहरूसँग भेट्ने गरेका थिए। तर यो हप्ता उनले भेट्न सकेनन्। बच्चनको कलेजोमा समस्या देखिएपछि गत मंगलबार मुम्बईस्थित नानावती अस्पतालमा भर्ना भएका थिए।
अस्पतालबाट फर्केर उनले आफ्नो स्वास्थ्य पूर्ण रूपमा निको नभएको कारण भेट्न नसक्ने बताएका थिए। त्यसको बाबजुद फ्यानहरूले उनलाई भेट्न निवास पुगे।
पछि उनले ट्वीटरमार्फत् माफी मागेका हुन्।
'भेट्न नसक्ने बताउँदा पनि आइतबार भेट्न आउनुभयो, माफी चाहन्छु तर म बाहिर आउन सक्दिनँ' उनले ट्वीटरमा लेखेका छन्। सन् १९८२ मा कार दुर्घटना हुँदा उनलाई हेपाटाइटिस बी भाइरसको संक्रमण भएको थियो।
