बलिउड अभिनेत्री ट्विंकल खन्नाले फिल्म खेल्न छाडे पनि लेखक र निर्माताका रूपमा आफ्नो बेग्लै पहिचान बनाइसकेकी छन्। सामाजिक सञ्जालमा निकै सक्रिय उनी प्रायःजसो आफ्ना फोटा र भिडियोमार्फत् आफ्ना फ्यानहरूसँग जोडिइरहेकी हुन्छन्।
हालै उनले एउटा फोटो सामाजिक सञ्जालमा राखेकी छन् जसले अहिले निकै चर्चा पाइरहेको छ। ट्विंकलले आफ्ना श्रीमान तथा बलिउड अभिनेता अक्षय कुमारले दिएको उपहार देखाउँदै फोटो राखेकी हुन्।
अक्षय कुमारले ट्विंकललाई विशेष डिजाइनको झुम्का दिएका छन्। यसमा हिरामोतीको कुरा होइन, तलपट्टी प्याज राखिएको छ।
अक्षय कुमारले दिएको उपहार आफूलाई निकै मनपरेको भन्दै ट्विंकलले सामाजिक सञ्जालमा भनेकी छन्- कहिलेकाहीँ स-साना र सामान्य कुराले पनि तपाईंको मन खुसी बनाउँछ।
ट्विंकलले यिनै प्याजवाला झुम्का लगाएर इन्स्टाग्राममा राखेको फोटोमा लेखेकी छन्- एउटा सुटिङबाट अर्को सुटिङमा। मलाई खुसी छ कि मेरो यो बहुमूल्य उपहार मसम्म आइपुगेको छ। यो अंकुरण हुनुअगावै लगाउने मौका पाएँ।'
उनका अनुसार यी झुम्का अक्षय कुमारले 'द कपिल शर्मा शो'बाट ल्याएका हुन्। कपिल शोमा अक्षयका साथमा करिना कपुर पनि गएकी थिइन्।
करिनालाई कार्यक्रममा यी प्याजवाला झुम्का देखाइएको भए पनि अक्षयले आफ्नी श्रीमती ट्विंकलका लागि ल्याइदिएका हुन्।
ट्विंकल खन्नाको यो फोटोमा फ्यानहरूका धेरै प्रतिक्रिया आएका छन्।
