बलिउड अभिनेता राजकुमार राव राम्रो अभिनय गर्नेमध्ये पर्छन्। उनले आफ्ना फिल्ममा भिन्न भिन्न भूमिका निर्वाह गर्दै आफूलाई अब्बल सावित गरिसकेका छन्।
उनको पछिल्लो फिल्म 'मेड इन चाइना' बक्स अफिसमा धेरै जम्न नसके पनि उनको अभिनय तारिफ नगर्ने कमै छन्।
उनको नयाँ फिल्म पनि चाँडै आउँदैछ। नयाँ वर्ष २०२० को अवसर पारेर राजकुमारले आफ्नो आगामी फिल्म 'लुडो' को दुई तस्बिर सेयर गरेका छन्।
उनले सेयर गरेको तस्बिरमा धेरै प्रयोगकर्ताले कमेन्ट गरेका छन् र केही अचम्म पनि मानिरहेका छन्।
दुवै फोटोमा राजकुमार नै देखिन्छन्।
पहिलो फोटोमा उनको रूप अलि बेग्लै भए पनि ठम्याउन गाह्रो हुँदैन। मोटरसाइकलमा बसेका उनको कपाल काँधसम्म लामो छ र उनले सेतो फ्रेम भएको चस्मा लगाएका छन्। मोटरसाइकलमा मिथुन चक्रवर्तीको फोटो र डाइलगबाट अनुमान लषाउन सकिन्छ, यो फिल्ममा राजकुमार मिथुन चक्रवर्तीका फ्यान हुन्छन्।
अर्कोमा भने उनको रूपै बेग्लै छ। उनी घाँघरचोलीमा ठाँटिएका छन् भने लामो कपाल छाडेका छन्।
गाजल, टीका, लिपस्टिक लगायत श्रृंगार गरेर उनी दुरूस्त युवती देखिएका छन्।
राजकुमारको यही युवती स्वरूपले धेरैलाई अलमल पारेको देखिन्छ। धेरैले उनलाई अभिनेत्री आलिया भट्ट जस्तो देखिएको भनेर प्रतिक्रिया पनि दिएका छन्।
एक प्रयोगकर्ताले फोटोमा लेखेका छन्- मैले त आलिया भट्ट होला भन्ठानेको !
अर्का प्रयोगकर्ताले क्रिती सनोन झैं देखिएको बताएका छन्।
अरू धेरैले पनि यो तस्बिर राजकुमारकै हो भने ठम्याउन भने मुश्किल भएको बताएका छन्।
अनुराग वाशुको 'लुडो' आपराधिक विषयमा आधारित फिल्म हो।
राजकुमार रावबाहेक यो फिल्ममा अभिषेक बच्चन, पंकज त्रिपाठी, आदित्य रोय कपुर, सान्या मल्होत्रा र फतिमा साना सैखको पनि मुख्य भूमिका छ।
