भारतमा कोरोना भाइरसबाट संक्रमितको संख्या दिनप्रतिदिन बढिरहेको छ। आइतबारसम्म भारतमा ४१ लाखभन्दा बढी संक्रमित भइसकेका छन्। हालै केही बलिउड कलाकारहरू पनि कोरोनाबाट संक्रमित भएका छन्। कोही निको भइसके भने कोही उपचाररत छन्।
हालसालै भने अभिनेता अर्जुन कपुरलाई कोरोना भएको भारतीय सञ्चारमाध्यम एनडिटिभीले जनाएको छ।
एनडिटिभीका अनुसार अर्जुनले यसबारे आफ्नै इन्स्टाग्राम एकाउन्टबाट जानकारी दिएका हुन्। उनले भनेका छन्, 'मलाई कोरोना भाइरस संक्रमण भयो भनेर सबैलाई जानकारी दिनु मेरो कर्तव्य हो। म ठीक छु र मलाई कुनै पनि लक्षण देखिएको छैन।'
अर्जुनले थप भनेका छन्, 'डाक्टरहरूको सल्लाहमा म घरमै आइसोलेसनमा बसेको छु। तपाईंहरूको माया र समर्थनका लागि धेरै धन्यवाद। आगामी दिनमा पनि मेरो स्वास्थ्यका बारेमा जानकारी दिने नै छु।'
केही समयअघि अभिनेताहरू अमिताभ बच्चन, अभिषेक बच्चन, ऐश्वर्य राय र जिनेलिया देशमुखलाई पनि कोरोना भएको थियो। उनीहरू सबैलाई अहिले निको भइसकेको छ।
