बलिउड अभिनेता अमिताभ बच्चन र अजय देवगन पर्दामा पुनः एकसाथ देखिने भएका छन्।
फिल्म बजार विश्लेषक तरण आदर्शले ट्विट गर्दै यी दुबै अभिनेता फिल्मको पर्दामा पुनः एकसाथ आउन लागेको जानकारी दिएका हुन्।
'ठूलो समाचार छिट्टै थ्रिलर ड्रामा फिल्म 'मे डे'मा अमिताभ बच्चन र अजय देवगन सँगै आउने। तपाईंहरूलाई भनिहालूँ अजय देवगन र अमिताभ बच्चनले पहिला पनि एकसाथ कयौं सुपरहिट र शानदार फिल्म गरिसकेका छन् जसमा 'मेजर साब', 'खाकी', 'सत्याग्रह',र 'हम किसी से कम नही' छन्। र यो 'मे डे'बाट सात वर्षपछि दुबै जना पुनः एकसाथ देखिनेछन्', तरणले ट्विट गरेका छन्।
यो फिल्मका लागि अजय र अमिताभ तय भइसकेको भएपनि अन्य कलाकारको छनौट बाँकी रहेको छ। फिल्मको काम डिसेम्बरबाट हैदराबादमा सुरू हुनेछ।
अजय फिल्ममा एक पाइलटको भूमिकामा हुनेछन्। फिल्मलाई अजयले निर्माण तथा निर्देशन गर्नेछन्।
अजयले यी फिल्मका अलावा हाल 'छलांग', द बिग बुल' र 'त्रिभंगा' फिल्म बनाइ रहेका छन्। यसैगरी उनी 'सूर्यवंशी', आरआरआर' र 'मैदान'मा देखिनेछन्।
