बलिउड अभिनेता सैफ अली खान र प्रभासको अभिनय रहेको फिल्म 'आदिपुरुष'को रिलिज मिति सार्वजनिक भएको छ। बलिउड हंगामाका अनुसार 'आदिपुरुष' सन् २०२२, अगस्ट ११ मा रिलिज हुने भएको हो।
सैफ अली खान र प्रभासको मुख्य भूमिका रहेको 'आदिपुरुष' ओम राउतले निर्देशन गर्दैछन्। फिल्मको रिलिज मिति निर्देशक ओमले नै ट्विटरमार्फत सार्वजनिक गरेका हुन्। उनले बिहीबार ट्विटरमा लेखेका छन्, '#आदिपुरुष थिएटरमा ११.०८.२०२०।'
फिल्म 'आदिपुरुष' थ्री-डी फिचर फिल्म हो। यो एक भारतीय महाकाव्यमा आधारित कथामा निर्मित छ जसमा असत्यमाथि सत्यको विजय देखाइनेछ। यसमा कला, संस्कृति र साहित्यको सही मिश्रण पाउन सकिने फिल्म टोलीले बताएको छ।
फिल्मको छोटो ट्रेलर पनि सार्वजनिक भइसकेको छ। ट्रेलरमा यो कथा ७ हजार वर्षअघिको भन्ने बुझाउन खोजिएको बलिउड हंगामाले लेखेको छ। ट्रेलर बिहीबार युट्युब च्यानल 'युनिभर्सल फक्स स्टुडिओ'बाट सार्वजनिक भएको हो।
'आदिपुरुष' हिन्दी र तलेगु भाषामा छायांकन हुनेछ। पछि यो तमिल, मलयम, कन्नाड लगायत अन्य भाषामा समेत उपलब्ध हुने बलिउड हंगामाले जनाएको छ।
भुषण कुमार, कृष्ण कुमार, ओम राउत, प्रसाद सुतार र राजेश नायरद्वारा निर्मित 'आदिपुरुष' हाल पोष्ट-प्रोडक्सनको चरणम छ। पोष्ट-प्रोडक्सनको काम सन् २०२१ सम्म चल्ने टोलीले अपेक्षा गरेका छन्।
