गायक तथा इन्डियन आइडलका होस्ट आदित्य नारायण आज मंगलबार आफ्नी प्रेमिका श्वेता अग्रवालसँग विवाह बन्धनमा बाँधिएका छन्। दुवै परिवारका अभिभावक र केही नजिकका इष्टमित्रको उपस्थितिमा उनीहरुले भारतको मुम्बई जुहूस्थित इस्कन मंदिरमा बिहे गरेकाे एहमदाबाद मिररले जनाएकाे छ।
आदित्यका बुबा उदित नारायणले एहमदाबाद मिररलाई दिएको जानकारी अनुसार, कोरोना फैलिने जोखिमका कारण आज भएको वैवाहिक कार्यक्रममा करिब ५० जना उपस्थित भएकाे बताएका छन्।
आदित्य चर्चित गायक उदित नारायण र गायिका दीपाका छोरा हुन्। बिहेमा बेहुलाका बुबा र आमा दुबैले दिल खोलेर नाचेका तस्बिर र भिडियोहरु भारतीय मिडियामा सार्वजनिक भएका छन्।
श्वेता र आदित्यले लामो समयकाे प्रेम सम्बन्धपछि बिहे गरेका हुन्। मोडल तथा अभिनेत्री श्वेताले उनले प्रभास स्टारर फिल्म राघवेन्द्र (२००३) बाट डेब्यू गरकी हुन्।
तंदूरी लव, शापितजस्ता फिल्ममा काम गरेकी श्वेता 'शापित' मा आदित्य नारायणसँगै देखिएकी थिइन्। शापित आदित्य नारायणको मुख्य नायकको रुपमा पहिलो फिल्म थियो। यो फिल्मलाई विक्रम भट्टले निर्देशन गरेका थिए। 'बाबुल कि दुआए लेती जा', 'सगुन' र 'देखो मगर प्यार से' लगायत टेलिशृंखलामा अभिनय गरेकी छिन्।
नोभेम्बर ३ मा आदित्यले सामाजिक सञ्जालमार्फत् आफ्नो बिहेको खबर सार्वजनिक गरेका थिए। उनले लेखेका थिए, 'हामी बिहे गर्दैछौं। श्वेतासँग बिहे गर्न पाउने म सबैभन्दा भाग्यमानी हुँ। मेरी सोलमेट...'
उनले त्यहीबेला डिसेम्बरमा बिहे गर्ने जानकारीसमेत दिएका थिए। उनीहरुको बिहेको तयारीको फोटो केही समयअघि सामाजिक सञ्जालमा भाइरल भएको थियो।
भोलि बुधबार मुम्बईको फाइभ स्टार होटलमा हुने 'रिसेप्सन' मा बलिउडका ठूला गायक गायिका र कलाकारहरुको जमघट हुने उदितले बताएका छन्। आदित्यको रिसेप्सनका लागि प्रधानमन्त्री नरेन्द्र मोदीदेखि अभिताम बच्चनसम्मलाई निम्तो दिइएको खबरमा जनाइएको छ।
