प्राय: रोमान्टिक भूमिकामा देखिने बलिउड अभिनेत्री कट्रिना कैफ अब 'सुपरहिरो' को अवतारमा देखिने छिन्।
बलिउड फिल्म निर्देशक अलि अब्बा जफरद्वारा निर्देशित नयाँ फिल्म 'सुपर सोल्जर' मा उनी कुनै हिरोसँग रोमान्स गर्ने छैनन्। बलिउड हंगामा अनुसार, फिल्म पूर्ण रूपमा कट्रिनाको चरित्र वरिपरि घुम्नेछ।
'सुपर सोल्जर' को अहिले प्रि-प्रोडक्सनको काम भइरहेको छ। यही फिल्मका लागि उनले मार्सल आर्टको तालिम लिनेसमेत समाचारमा जनाइएको छ। उनले शरीरको लचकता र गति बढाउने तालिमसमेत लिनेछिन्।
फिल्म छायांकनका लागि गत सेप्टेम्बरमा निर्देशक अलि दुबईं पुगेका थिए। यो फिल्म अबुधाबी, दुबई, पोल्यान्ड, जर्जिया र भारतको उत्तराखण्डमा छायांकन हुनेछ।
फिल्मको छायांकन अर्को वर्षबाट सुरू हुने जनाइएको छ। अहिले कट्रिना 'फोन बुथ' र 'टाइगर ३' को सुटिङमा व्यस्त छिन्। कट्रिना कैफ र निर्देशक अलि जफरको यो तेस्रो सहकार्य हुनेछ। कट्रिनाले यसअघि अलिद्वारा निर्देशित फिल्म 'मेरे ब्रदरकी दुल्हन' र 'टाइगर जिन्दा है' मा अभिनय गरिसकेकी छन्।
