बलिउड अभिनेत्री सुस्मिता सेनकी छोरी रेनी सेनको इन्स्टाग्राम अकाउन्ट ह्याक भएको छ। यस विषयमा सुस्मिताले आफ्नो इन्स्टाग्राम अकाउन्टमार्फत जानकारी गराएकी हुन्।
हिन्दुस्तान टाइम्सका अनुसार सुस्मिताले छोरी रेनीको इन्स्टाग्राम प्रोफाइलको स्क्रिनसट राख्दै त्यसमाथि 'ह्याक्ड' भनेर पोष्ट गरेकी छन्।
पोष्टसँगै क्याप्सनमा लेखेकी छन्, 'कृपया नोट गर्नुहोला। मेरी छोरी रेनीको इन्स्टाग्राम खाता कुनै मूर्खले ह्याक गरेको छ। तर उनीहरूलाई थाहा छैन नयाँ खाता बनाएर नयाँ सुरूआत गर्न रेनी खुसी छिन्। ती ह्याक गर्ने मान्छेका लागि मलाई नराम्रो लाग्यो! अपडेट पोष्ट गर्दै गर्छु। सबैलाई धेरै माया!'
सुस्मिताको यो पोष्टमा थुप्रै अरू इन्स्टाग्राम प्रयोगकताहरूले प्रतिक्रिया जनाएका छन्। केहीले ह्याक गर्ने ती व्यक्तिविरूद्ध उजुरी दर्ता गराउनुपर्ने सल्लाह दिएका छन्। केहीले भने इन्स्टाग्रामलाई यस विषयमा रिपोर्ट बुझाउनु पर्ने बताएका छन्।
अहिले रेनीको इन्स्टाग्राम अकाउन्ट प्राइभेट गरिएको छ भने उनको फलोअर्स संख्या पनि घट्दैछ।
रेनी पनि अब छिट्टै फिल्म क्षेत्रमा प्रवेश गर्दैछिन्। उनको अभिनय रहेको छोटो फिल्म 'सुत्ताबाजी' सार्वजनिक हुँदैछ। फिल्ममा दीया कुमार नामक एक पात्रको कथा देखाइएको छ, जो लकडाउन समयमासमेत आफ्नो आमा-बुबासँग झगडा गर्छिन्। र, लुक्दै धूमपान गर्छिन्।
कबिर खुरानाद्वारा निर्देशित फिल्म 'सुत्ताबाजी' फ्यामिली ड्रामा हो। सिमरन लखन्पल, रम्निक स्वने र पंकज रुगंटाद्वारा निर्मित यो फिल्म डिसेम्बर २०२० मै सार्वजनिक गर्ने भनिएको छ।
रम्निकले सिनेस्टानलाई फिल्मबारे भनेका थिए, 'सुत्तनबाजी विश्वास र सम्बन्धमा आधारित कथा हो। यो असम्भवमा सम्भावना देखाउने कथा हो।'
अभिनेत्री सुस्मिताको भने पछिल्लो समय डिज्नी हटस्टार प्लसबाट प्रसारण टेलिसिरियल 'आर्या'मा अभिनय रहेको थियो।
