बलिउड गायिका नेहा कक्कड आमा बन्ने भएकी छिन्। उनले यो जानकारी आफ्नो इन्स्टाग्राममा फोटो सेयर गर्दै सार्वजनिक गरेको खबर हिन्दुस्तान टाइम्सले छापेको छ।
नेहाले इन्स्टाग्राममा आफ्नो र उनका श्रीमान् रोहनप्रित सिंहको फोटो राखेकी छिन् जसमा नेहाको बढेको पेट स्पष्ट देखिन्छ। उनले क्याप्सनमा लेखेकी छन्, '#अब ख्याल राख्नु।'
नेहाको यो पोष्ट र क्याप्सनमा रोहले प्रतिक्रिया जनाउँदै भनेका छन्, 'अब त तिम्रो ख्याल झन् बढी राख्नुपर्छ नेहु।' नेहाले तस्वीर सार्वजनिक गरेलगत्तै उनलाई बधाइ दिन उनका प्रशंसक र बलिउडका कलाकारहरूको ओइरो लागेको छ।
नेहाले रोहनसँग सम्बन्ध सार्वजनिक गरेको भोलिपल्टै विवाह गरेकी थिइन्।
उनीहरूको भेट पहिलो पटक 'नेहा दु ब्या' म्युजिक भिडिओ गर्नेक्रम भएको थियो। 'हामी पहिलो पटक सेटमै भेटेका थियौं। 'नेहा का ब्या' नामको त्यो गीतमा जे लेखिएको थियो त्यो वास्तविकतामा परिणत हुन्छ भन्ने सोचेकै थिइनँ। त्यो गीतले मेरो जीवन नै बदलिदिएको छ,' रोहनले हिन्दुस्तान टाइम्सलाई भनेका छन्। नेहाले पनि रोहनलाई भेट्दाको अनुभव हिन्दुस्तान टाइम्ससँगको अन्तर्वार्तामा खुलाएकी छन्।
'सेटमा भएका सबैमध्ये उहाँ भिन्नै हुनुहुन्थ्यो। उहाँको बोलाइ नम्र थियो। उहाँप्रति म आकर्षित भएकी थिए,' नेहाले भनेकी थिइन्, 'मलाई त्यही बेला लागेको थियो कि उहाँ नै मेरा लागि हुनुहुन्थ्यो।' हिन्दुस्तान टाइम्सका अनुसार नेहा र उनको प्रेमी रोहनको विवाह अक्टुबर २४ तारिकमा भएको थियो। यी दम्पती हनिमुनका लागि दुबई पुगेका थिए।
सामाजिक संजालमा पोष्ट गर्दै नेहाले आफ्नो फ्यानलाई आफ्नो दैनिकीबारे अपडेट गराएकी थिइन्। अहिले उनीहरू गर्भवती भएको जानकारी पनि इन्स्टाग्रामबाट गराएकी हुन्।
