चर्चित अभिनेता अक्किनेनी नागार्जुनको नयाँ तेलेगु फिल्म ‘वाइल्ड डग’ नेटफ्लिक्सबाट सार्वजनिक हुने भएको छ। फिल्म हलबाट सार्वजनिक नभई सन् २०२१ जनवरी २६ मा नेटफ्लिक्सबाट हुने भारतीय अखबार हिन्दुस्तान टाइम्सले जनाएको छ।
जनवरी २६ भारतमा गणतन्त्र दिवस मनाइन्छ। अबिस्वर सोलोमनद्वारा निर्देशित ‘वाइल्ड डग’ मा नागार्जुन एनआइए, राष्ट्रिय अन्वेषण एजेन्सीका अफिसरको भूमिकामा देखिनेछन्। हिन्दुस्तान टाइम्सका अनुसार, नेटफ्लिक्सले ‘वाइल्ड डग’ सार्वजनिक गर्ने अनुमति लिइसकेको छ। फिल्म छायांकन हालै सकिएको छ। अब यसको पोस्ट प्रोडक्सनको काम मात्रै बाँकी छ।
अभिनेता नागर्जुनले ट्विटरमा यस सम्बन्धी फोटो सेयर गर्दै ट्विट गरेका छन्, ‘वाइल्ड डगको सुटिङ सकिएको छ। निकै मिहिनेती र प्रतिभाशाली फिल्म टोलीलाई बिदाइ गर्नुपर्दा दुःख लागेको छ।’
‘वाइल्ड डग’को पोस्टर गत डिसेम्बरमा सार्वजनिक गरिएको थियो। त्यसबेला पनि नागार्जुनले ट्विटमा खुसी साट्दै लेखेका थिए, ‘लामो समयपछि एउटा सत्य जीवन प्रेरित कथाको हिस्सा हुन पाउँदा उत्साहित छु। फिल्ममा म एक एनआइए अफिसरको भूमिकामा हुनेछु। नयाँ युगमा नयाँ ढाँचाबाट फिल्म निर्माण भइरहेको छ। नयाँ विषयको सिकाइ कहिल्यै रोकिने छैन।’
फिल्म ‘वाइल्ड डग’ मा नागार्जुनसँगै किरण कुमारको अभिनय रहनेछ। फिल्म टोलीको सम्पूर्ण विवरण सार्वजनिक हुन भने बाँकी नै छ।
