बलिउड अभिनेत्री कंगना रनावतले आफ्नो नयाँ फिल्मको पोस्टर सार्वजनिक गरेकी छन्। कंगनाले सामाजिक सञ्जालमार्फत् फिल्म 'धाकड'को पोस्टर सार्वजनिक गरेकी हुन्। सार्वजनिक पोस्टरमा बोल्ड देखिएकी कंगनाको हातमा तरबार छ भने आखाँमा आक्रोश।
हिन्दुस्तान टाइम्सका अनुसार, कंगनाले ट्विटरमा पोस्टर सेयर गर्दै लेखेकी छन्, ‘उनी निडर र ज्वलन्त छिन्। उनी हुन् एजेन्ट अग्नि। भारतकी पहिलो एक्सन थ्रिलर महिला। ह्यासट्याग धाकड सन् २०२१ को अक्टुबर १ गतेदेखि सिनेमा घरबाट प्रसारण हुँदै!’
रजनेश घई निर्देशित 'धाकड'मा कंगनासँगै अभिनेता अर्जुन रामपाल र अभिनेत्री दिव्या दत्त मुख्य भूमिकामा देखिँदैछन्। गत वर्षको तिहारमा सार्वजनिक हुने भनिएको फिल्म कोरोना महामारीका कारण सार्वजनिक हुन सकेन। अब भने फिल्म आगामी अक्टुबर १ मा सिनेमा हलबाटै सार्वजनिक हुन लागेको हो। फिल्मको टिजर गत अगस्टमा सार्वजनिक भएको थियो।
‘धाकड’मा कंगनाको लुक्स हलिउड निर्देशक साइमन वेस्टको सिरिज 'लारा क्राफ्टः टम रेडर’को पात्रबाट प्रेरित भएको भनिएको छ।
महामारीका कारण फिल्म क्षेत्रमा पनि निकै लामो समय ‘लकडाउन’ लाग्यो। यस्तोमा समेत विभिन्न कारण कंगना हाइलाइटमा रहिन्।
कंगाना ‘धाकड’सँगै छिट्टै ए.एल. विजय निर्देशित फिल्म ‘थलाइवा’ र सर्वेश मेवाराको फिल्म ‘तेजास’मा देखिँदैछिन्। थलाइवामा उनले तमिलनाडुकी पूर्व मुख्यमन्त्री जया ललिताको भूमिका निर्वाह गरेकी छन्। यसबाहेक कंगाना नयाँ फिल्म ‘मर्णिकर्णिका रिटर्न’को तयारीमा छिन्।
