गीतकार तथा पटकथाकार जावेद अख्तरले डान्सर राखी सावन्तको जीवनीमा फिल्म लेख्ने चासो देखाएका छन्। बलिउड हंगामाका अनुसार यसबारे राखीले जानकारी दिएकी हुन्।
स्रोतले यसबारे थप बुझ्न जावेदसँग कुरा गरेको थियो। जसमा जावेदले राखीको कुरा स्वीकारे। उनले भने, ‘हो। उनले जे भनिन् सत्य बोलिन्। झन्डै चार-पाँच वर्षअघिको कुरा हो। जुनबेला राखी र म एउटै फ्लाइटमा थियौं। उनले आफ्नो बाल्यकालका घटनाहरू सुनाइन्। त्यसबेला मैले उनको जीवनीबारे पटकथा लेख्छु भनेको थिएँ।’
राखी डान्सरसँगै मोडल, अभिनेत्री र टेलिभिजन होस्ट हुन्। भारतीय रियालिटी कार्यक्रम 'बिग बोस सिजन १' र 'सिजन १४' मा सहभागीता जनाएसँगै उनी विभिन्न कारण विवादमा फसेकी थिइन्।
बलिउड हंगामाका अनुसार राखी बारम्बार विवादमा आउने भएकोले जावेदसँग यसबारे पुष्टि गर्न कुराकानी भएको थियो।
पर्दामा आफ्नो भूमिकाका लागि बलिउडका कुन हिरोइन बढी सुहाउलान् भन्नेबारे राखी स्वयंमले केही अभिनेत्रीहरुको नाम पनि लिएकी छिन्। उनले विद्या वालनकाे नाम सुरुमा लिइन्। अभिनेत्री विद्या वालनले दक्षिण भारतीय अभिनेत्री सिल्क स्मिताको कथामा आधारित 'डर्टी पिक्चर'मा उत्कृष्ट अभिनय गरेर चर्चा पाएकी थिइन्।
