चर्चित बलिउड गायक अरिजीत सिंह अब संगीतकार बन्ने भएका छन्। उनी सान्या मल्होत्रा अभिनित नेटफ्लिक्सको 'पगलैट'बाट संगीतकार बन्न लागेको बलिउड हंगामाले लेखेको छ।
'मैले संगीतकारका रुपमा सुरु गर्न लागेको प्रोजेक्ट मेरो मनको एकदमै नजिक छ। संसारलाई आफ्नो संगीत सुनाउन पाउनु मेरो सौभाग्य हो,' यो उत्साहजनक खबरबारे गायक अरिजीतले भने, 'संध्या पात्रको आत्मविश्वास र विजयको मिठो कहानी मेरो संगीत यात्राजस्तै छ। म पगलैटजस्तो विशेष फिल्मसँग जोडिन पाएकोमा गर्व महसुस गर्छु।'
उमेश विष्टको लेखन तथा निर्देशनमा बन्न लागेको 'पगलैट' मा सान्यासँगै सायनी गुप्ता, श्रुति शर्मा, आशुतोष राना, शीबा चड्ढा आदि कलाकार मुख्य भूमिकामा देखिनेछन्।
अरिजीत पार्श्व गायक बन्नुअघिदेखि संगीत प्रोड्युसरका रुपमा सक्रिय थिए। सन् २०१३ को 'आशिकी २' को क्यो कि तुम हि हो बोलको गीत हिट भएपछि उनी धेरै संगीतकारको पहिलो रोजाइमा परे। एकपछि अर्का सुमधुर गीतबाट स्रोताको मन जित्न सफल भइरहे। उनी विगत एक दशकमा सबैभन्दा बढी रुचाइएका बलिउड गायक हुन्।
