चर्चित पंजाबी गायक दिलजानको सडक दुर्घटनामा मृत्यु भएको छ। सोमबार राति करिब २ बजे अमृतसरको जन्डियालामा अत्याधिक गतिमा गुडेको उनको कार अनियन्त्रित भएपछि निधन भएको इन्डिया टुडेले छापेको छ।
खबर अनुसार, ३१ वर्षीय गायक दिलजानको कार सडकमा पार्किङ गरिएको ट्रकसँग ठक्कर खाँदा घटनास्थलमै मृत्यु भएको हो।
जंडियाला प्रहरीका अनुसार दिलजानको दुर्घटनापछि केही मानिसले उनलाई अस्पताल लगे पनि अस्पताल पुग्नुअघि नै उनको निधन भइसकेको डाक्टरहरुले जानकारी गराएका थिए।
दिलजान सन् २०१२ मा संगीत रियालिटी शो 'सुर क्षेत्र'मा दोस्रो बनेपछि चर्चामा आएका थिए। दिलजानको निधनमा पंजाबका मुख्य मन्त्री क्याप्टेन अमरिन्दर सिंहले सडक दुर्घटनामा युवा गायकलाई गुमाउनु परेको भन्दै शोक व्यक्त गरे। उनको असामयिक निधनपछि सामाजिक सञ्जालमा उनका शुभेच्छुकहरुले समवेदना व्यक्त गरेका छन्।
दर्जनौं चर्चित पंजाबी गीत गाएका दिलजानले केही भजन पनि गाएका छन्।
