गत आइतबार मे १ तारिक अभिनेत्री अनुष्का शर्माको जन्मदिन थियो। 'ब्यान्ड बाजा बारात', 'पिके', 'सुल्तान' जस्ता चर्चित फिल्मबाट लाखौं प्रशंसक कमाएकी उनको जन्मदिनमा हजारौंले शुभकामना दिए। ३३ वर्ष उमेर पुगेको अवसरमा ती प्रशंसा पाएर उनी खुसी पनि भइन् तर यी अभिनेत्रीले जन्मदिन भने मनाइनन्।
बलिउड हंगामाले भारतमा कोभिड-१९ को दोस्रो लहरका कारण मानिसहरु आधारभूत उपचार सुबिधाबाट वञ्चित रहेको अप्ठ्यारो परिस्थिति भएकोले अनुष्काले जन्मदिन नमाएको लेखेको छ। चाँडै अनुष्का र उनका श्रीमान् विराट कोहलीले कोभिड-१९ बाट प्रभावितलाई सहयोग गर्ने सार्वजनिक गर्ने पनि खबरमा उल्लेख छ।
'हाइ गाइज, आशा छ तपाईंहरु सबै सुरक्षित हुनुहुन्छ। मलाई जन्मदिनको शुभकामना दिने सबैलाई म धन्यवाद भन्न चाहन्छु। यसले मेरो जन्मदिन साँच्चिकै विशेष बनायो। तर हालको पीडा र नाजुक परिस्थितिमा जन्मदिन मनाउन उचित लागेन। तर तपाईंहरुले मलाई पठाएका विशेष सन्देशहरु मैले हेरेँ र अब मसँग तपाईंहरुका लागि विशेष सन्देश छ।
देशको यो संकटमा हामी सबै एक जुट बनौं भनेर म सबैमा आग्रह गर्न चाहन्छु। विराट र म हाम्रो तर्फबाट गर्ने सहयोगको तयारी गरिरहेका छौं,' अनुष्काले लेखेकी छन्, 'हामी यसबारे चाँडै विस्तृत जानकारी बाँड्नेछौं ताकि तपाईंहरु पनि यो अभियानको हिस्सा बन्न सक्नुहोस्। याद राखौं, हामी सबै सँगै छौं, साथीहरु सुरक्षित बस्नुहोला र आफ्नो ख्याल राख्नुहोला।'
