सुपरहिट मलयालम फिल्म 'दृश्यम २' को हिन्दी रिमेक बन्ने भएको छ। पानोरमा स्टुडियो इन्टरनेसनलका निर्माता कुमार मंगत पाठकले मंगलबार आफूले फिल्मको हिन्दी कपीराइट लिएको बताएका हुन्।
द इन्डियन एक्सप्रेसका अनुसार निर्माता पाठकले भने, 'दृश्यम २ को व्यापक सफलतासँग यो कथा मनबाट महसुस गरेर इमानदार रुपमा प्रस्तुत गर्नुपर्नेछ र हामी निर्माता यसका लागि तयार छौं।'
निर्देशक जिथु जोसेफको लेखनसमेत रहेको 'दृश्यम २' मा मलयालम सुपरस्टार मोहनलाल जर्जकुट्टीको भूमिकामा दोहोरिएका छन्। सन् २०२१ मा अमेजन प्राइममा सार्वजनिक 'दृश्यम २' ले प्रशंसक र समीक्षकबाट दृश्यम एकजत्तिकै प्रशंसा पाएको थियो।
दृश्यमको पहिलो भागको हिन्दी रिमेक निशाकान्त कामतको निर्देशनमा बनेको थियो जसमा अजय देवगण र तब्बुले मुख्य भूमिका निर्वाह गरेका थिए।
