भारतीय अभिनेता अक्षय कुमारले आफ्नो नयाँ म्युजिक भिडिओ ‘फिलहाल २’को टिजर सार्वजनिक गरेका छन्। अभिनेत्री नुपूर सोननसँग देखिएका अक्षयले भिडिओ टिजर आफ्नो ट्विटरमा सेयर गरेका हुन्।
हिन्दुस्तान टाइम्सका अनुसार ट्विटरमा गीतको टिजर सार्वजनिक गर्दै अक्षयले ‘फिलहालसँग प्रेम गर्ने समय नजिकिँदै छ’ क्यापसन ट्विट गरेका थिए।
टिजरको सुरुवातमा निलो लुगा लगाएका अक्षयलाई मोटरसाइकल चलाइरहेको देखिन्छ। उनी नुपूर सोनन र एकजना व्यक्ति चढेको गाडी पछ्याइरहेका हुन्छन्। ती व्यक्ति नुपूरको हुनेवाला श्रीमान हुन् जसको भूमिका अभिनेता एमी भिर्कले निर्वाह गरेका छन्।
भिडिओमा अक्षयलाई गाडीमा अल्झिएको नुपूरको दुपट्टा मिलाउन उनलाई पछ्याएको देखिन्छ। यो दृश्यपछि अक्षय र नुपूरबीचका अन्य थुप्रै दृश्य देखाइएको छ। अन्तमा भने अक्षय नुपूरको विवाहमा नाचिरहेका हुन्छन्।
प्रशंसकहरुले ‘फिलहाल २’को टिजर निकै मन पराएका छन्। अक्षयको ट्विटर कमेन्टमा उनका उत्साहित प्रशंसकहरुले यो म्युजिक भिडिओ फिल्म नै बन्नु पर्ने माग गरेका छन्। केहीले भने अक्षयको अभिनयको प्रशंसा गरेका छन्।
अभिनेत्री तथा गायिका नुपूरले ‘फिलहाल २’ उनका लागि गीत मात्र नभई जीवनको ठूलो अवसर रहेको बताएकी छन्।
नुपुर सोननले चर्चित् बलिउड अभिनेत्री कृति सोननकी बहिनी हुन्। उनले सन् २००५ मा ‘बेकरार कर्के’ बोलको गीत आफ्नो संगीत यात्रा सुरु गरेकी थिइन्। पछि उनले ‘एक भिलेन’ फिल्मको ‘तेरी गलिया’ गीत गाएर युटुबमा चर्चा कमाएकी थिइन्। ‘फिलहाल २’बाट उनले आफ्नो अभिनय करियर सुरु गरेकी हुन्।
‘फिलहाल २’को पूरा भिडियो जुलाई ६ मा सार्वजनिक हुने हिन्दुस्तान टाइम्सले जनाएको छ।
