बलिउड अभिनेत्री अनन्या पान्डेको घरमा नार्कोटिक्स कन्ट्रोल ब्युरो (एनसीबी) ले बिहिबार छापा मारेको छ। एनसीबीले पान्डेको मुम्बईस्थित घरमा आर्यन खानसँग जोडिएको क्रुज ड्रग्स पार्टी केसको छानबिन गर्ने क्रममा छापा मारेको हिन्दुस्तान टाइम्सले जनाएको छ।
बलिउड लाइफका अनुसार एनसीबी छापाबारे विस्तृत विवरण बाहिर आउन बाँकी छ। इन्टरनेटमा सार्वजनिक एउटा भिडिओमा अभिनेत्री अनन्याको घरबाट एनसीबी पदाधिकारीहरु निस्किरहेको र उनीहरुले अनन्याका केही सामान साथ लगेको हुनसक्ने बलिउड लाइफले लेखेको छ।
एन्टी ड्रग्स एजेन्सी एनसीबीले गत असोज १७ गते मुम्बईको एउटा पानीजहाजमा छापा मारेर शाहरुख खानका छोरा आर्यनलाई पक्राउ गरेको थियो।
एनसीबीले अनुसन्धानका क्रममा आर्यनसँग बलिउडकी उदीयमान अभिनेत्री पनि यो केसमा जोडिएको हुनसक्ने बताएको खबर बाहिरिएको थियो। अनन्यालाई स्पष्टिकरणका लागि एनसीबले उपस्थित हुनुपर्ने नोटिस दिएको बताइएको छ।
'स्टुडेन्ट अफ द इयर २' बाट बलिउडमा डेब्यु गरेकी अभिनेत्री अनन्या अभिनेता चंकी पाण्डेकी छोरी हुन्।
