यो वर्ष बलिउडका सबभन्दा चर्चित जोडी कट्रिना कैफ र विक्की कौशलको बिहे भएको एक साता हुन लाग्यो। तर उनीहरूको चर्चा अझै सेलाएको छैन।
उनीहरूको बिहे राजस्थानमा भएको हो। उक्त बिहेमा बलिउडका धेरै कलाकार सहभागी थिए। कट्रिना र विक्कीले बिहेपछि केही फोटाहरू सामाजिक सञ्जालमा राखेका थिए। थुप्रै प्रशंसक र कलाकाहरूले फोटामा कमेन्ट गर्दै बधाइ दिएका छन्।
एनडिटिभीका अनुसार उनीहरूलाई बधाइ दिनेमा प्रियंका चोपडा, आलिया भट्ट, ऋतिक रोशन, करिना कपूदेखि अनुष्का शर्मासम्म छन्। यी सबै बधाइ सन्देशमध्ये अहिले अनुष्का शर्माको सन्देशले धेरैको ध्यान खिचेको छ।
अनुष्का शर्माले भर्खर बिहे भएका कट्रिना र विक्कीलाई शुभकामना दिँदै सन्देश पनि छाडेकी छन्।
अनुष्काले लेखेकी छन्, 'तपाईंहरू दुवैलाई धेरै धेरै शुभकामना! आशा छ कि तपाईंहरू सधैं साथ रहनुहुनेछ। तपाईंहरूबीच प्रेम र समझदारी यस्तै बनिरहोस्। सँगै अर्को कुरामा पनि खुसी लागेको छ। अब बिहे भइसक्यो, त्यसैले आफ्नो घरमा सर्न सक्न हुनेछ। हामीले निर्माणको कामको चर्को आवाज अब सुन्न पर्दैन होला।'
एनडिटिभीका अनुसार अनुष्का शर्माको यो पोस्टले कट्रिना र विक्की कोहली परिवारका छिमेकी बन्न लागेको पुष्टि भएको छ। उनीहरूले अनुष्का-विराट बस्ने भवनमै अपार्टमेन्ट लिएका छन्। यो भवन वोर्लीमा छ र यसको नाम ओमकार-१९७३ हो।
खबरका अनुसार अनुष्का-विराटको अपार्टमेन्ट भारू ३४ करोडको हो। यो ७ हजार वर्गफिटभन्दा बढी क्षेत्रमा फैलिएको छ।
कट्रिना र विक्कीको घर पनि यत्तिकै भएको अनुमान छ।
पत्रकार र पाहुनाहरूलाई फोटो तथा भिडिओ खिच्न निषेध गरिएकाले कट्रिना-विक्कीको बिहे धेरै चासोको विषय बनेको थियो। उनीहरूको बिहेका भिडिओ अमेजन प्राइमले ८० करोड भारूभन्दा बढीमा किनेको बताइएको छ। भारतीय सञ्चारमाध्यमहरूका अनुसार यो बिहेको भिडिओ ओटिटी प्लेटफर्ममा सार्वजनिक गरिनेछ।
