अभिनेता अल्लु अर्जुनको सुपरहिट तेलेगू फिल्म 'अला वैकुन्ठपुरमलो' को हिन्दी डब ट्रेलर सार्वजनिक भएको छ।
'पुष्पाः द राइज' को हिन्दी संस्करणको अपार सफलतापछि अल्लु अर्जुन यो तेलेगू फिल्म पनि हिन्दी भाषामा डब हुने भएको हो।
भारतीय सञ्चारमाध्यम इन्डिया टुडेका अनुसार पुष्पाः द राइजले उत्तरी भारत र अन्य ठाउँमा पाएको सफलता देखेपछि अल्लुको फिल्म अला वैकुन्ठपुरमलोलाई हिन्दीमा डब गर्ने निर्णय निर्माताहरूले गरेका हुन्।
यसकै हिन्दी ट्रेलर गोल्डमाइन्सको आधिकारिक युट्युब च्यानलमार्फत सार्वजनिक भएको हो।
अला वैकुन्ठपुरमलो नयाँ फिल्म भने होइन। यो सन् २०२० मै रिलिज भएको फिल्म हो र यसले दक्षिण भारतमा राम्रो सफलता पनि पाएको थियो। फिल्ममा अल्लु अर्जुनसँगै पूजा हेज, तब्बू, जयराम, सुसान्त, निवेथा पेथुराज लगायतको पनि मुख्य भूमिका छ।
अला वैकुण्ठपुरमलो त्रिविक्रम श्रीनिवासले निर्देशन गरेका हुन् भने यसको निर्माण मनीष साहले गरेका हुन्। यो फिल्म आगामी फेब्रुअरी ६ तारिकमा गोल्डमाइन्सको टिभी च्यानल ढिन्चकमा भारतीय समयअनुसार राति ८ बजे रिलिज हुने बताइएको छ।
दक्षिण भारतीय फिल्म पुष्पाः द राइजले उत्तरी भारतका हलमा तहल्का मच्चाएको देखेपछि अला वैकुन्ठपुरमलोका निर्माण टोलीले यसलाई हिन्दीमा डब गरेर रिलिज गर्ने भएका हुन्।
यो फिल्म हिन्दी भाषामा भए पनि यसको नाम भने फेरिने छैन। यो अला वैकुन्ठपुरमलो नाममै रिलिज हुनेछ।
सुरूमा अला वैकुन्ठपुरमलो हिन्दी संस्करणमा बनाएर हलमै रिलिज हुने भनिएको थियो। तर अल्लु अर्जुनको फिल्म हलमा लाग्ने भएपछि यही समय आसपास रिलिज हुन लागेका बलिउड फिल्मलाई चुनौती हुने देखियो।
यसमा सबभन्दा धेरै समस्या कार्तिक आर्यन र कृति सेननको मुख्य भूमिका रहेको 'शेहजादा' लाई पर्ने अनुमान छ। किनकी शेहजादा अला वैकुन्ठपुरमलोकै हिन्दी रिमेकका रूपमा बनिरहेको फिल्म हो। शेहजादा सन् २०२२ नोभेम्बर ४ मा रिलिज हुने भनिएको छ।
हिन्दी संस्करण सार्वजनिक हुने भएपछि अला वैकुन्ठपुरमलो र शेहजादा टोलीबीच केही विवाद बढेको थियो। हिन्दीमा फिल्म अहिल्यै सार्वजनिक नगर्न भनेर शेहजादा टोलीले अला वैकुन्ठपुरमलो निर्माण पक्षलाई ८ करोड भारू दिएको पनि बताइएको छ। यसका बाबजुद दुई पक्षबीच कुरा मिल्न सकेन।
केही समयअघि मात्र अला वैकुन्ठपुरमलो शेहजादाभन्दा पहिले रिलिज हुने भएपछि अभिनेता कार्तिक आर्यनले फिल्म छाड्ने धम्की दिएका पनि अला वैकुन्ठपुरमलोका निर्माता मनीष साहले बताएका थिए। मनीषले कार्तिकले एकदमै गैर-व्यावसायिक व्यवहार गरेको पनि बताएका थिए।
मनीषसँग अला वैकुन्ठपुरमलोको हिन्दी संस्करण सार्वजनिक गर्ने सर्वाधिकार छ।
मनीषले इन्डिया टुडेसँगको अन्तर्वार्तामा भनेका थिए, 'शेहजादा निर्माण टोली हाम्रो फिल्मको हिन्दी संस्करण हलमा सार्वजनिक नहोस् भन्ने चाहन्थे। कार्तिकले पनि फिल्म हलमा रिलिज भए छाड्ने भने। यही कारणले निर्माण टोलीलाई ४० करोड नोक्सान पनि भयो। उनले एकदमै गैर-व्यावसायिक व्यहोरा देखाए।'
उनले थपे, 'मैले शेहजादा निर्माण टोलीलाई चिनेको दस वर्ष भयो। मेरा नजिकका मान्छेले यसरी ४० करोड गुमाएको म हेर्न सक्दिनँ। त्यसैले मैले मेरो योजना त्यागिदिएँ। यसो गर्दा उल्टो मैले २० करोड घाटा खानुपर्यो। अनि दुई करोडमा हिन्दी डब गरेँ। मेरो चाहना यो फिल्म पुष्पाभन्दा भव्य होस् भन्ने थियो। अब मैले यो फिल्म सार्वजनिक गरिनँ भने मलाई अझै धेरै नोक्सान हुनेछ। त्यसैले यसलाई म मेरो च्यानलमा सार्वजनिक गर्दैछु। मैले यो सबै कार्तिक आर्यनका लागि गरेको होइन, अल्लु अर्विन्द (अल्लु अर्जुनका बुवा तथा फिल्म निर्माता) का लागि गरेको हुँ। म कुनै बलिउड हिरोका लागि यो सबै किन गरूँला र? म उनलाई चिन्दिनँ।'
शेहजादा भुषण कुमार, कृसन कुमार, अल्लु अर्विन्द, एस राधा कृष्णा र अमन गिलको निर्माणमा बन्दै गरेको फिल्म हो। अल्लु अर्विन्द अला वैकुन्ठपुरमलोका पनि निर्माता हुन्।
अला वैकुन्ठपुरमलो हलमा सार्वजनिक नहुनेबारे गोल्डमाइन्सले ट्विटर मार्फत् पनि जानकारी दिइसकेको छ।
गोल्डमाइन्सको ट्विटमा लेखिएको छ- मनीष साह, गोल्डमाइन्स र शेहजादाका निर्माण टोलीबीच सहमति भएपछि अला वैकुन्ठपुरमलोको हिन्दी संस्करण हलमा रिलिज नहुने निर्णय भएको छ। यो निर्णयमा सहमति जनाएकामा मनीष साहप्रति शेहजादा टोली कृतज्ञ छ।
एनडिटिभीका अनुसार मनीष साहले कार्तिक आर्यनलाई गैर-व्यावसायिक भनेपछि शेहजादा निर्माता भुषण कुमारले पनि विज्ञप्तिमार्फत् प्रतिक्रिया दिएका थिए। उनले फिल्म रिलिजको निधो गर्ने कुरा अभिनेतामा नभएर सधैं निर्मातामा हुने बताउँदै कार्तिक आर्यनको बचाउ पनि गरेका थिए।
उनले भनेका थिए, 'हामीले निर्मातालाई नै हलमा शेहजादा पहिले लाग्नुपर्छ भन्ने लागेको हो। हामीले यसबारे गोल्डमाइन्ससँग अनुरोध गरेका हौं। मैले कार्तिकलाई उनको करिअरको सुरूआती दिनदेखि नै चिनेको हुँ। हामीले सँगै केही फिल्म पनि गरेका छौं। उनी सबभन्दा व्यावसायिक कलाकारमध्ये एक हुन्।'
