बलिउड अभिनेत्री आलिया भट्टले अब हलिउड फिल्म खेल्ने भएकी छन्। उनले नेटफ्लिक्सको थ्रिलर फिल्म 'हार्ट अफ स्टोन' बाट हलिउडमा डेब्यु गर्न लागेकी हुन्।
भारतीय सञ्चारमाध्यम इन्डियन एक्सप्रेसका अनुसार यो फिल्ममा चर्चित हलिउड अभिनेत्री गल गडोट र अभिनेता जेमी डोरनानको मुख्य भूमिका हुनेछ। गल गडोट 'वन्डर वुमन' का लागि चर्चित अभिनेत्री हुन्। त्यस्तै जेमी डोरनान 'फिफ्टी सेड्स अफ ग्रे' बाट चर्चामा आएका अभिनेता हुन्।
हलिउडका चर्चित दुई कलाकारसँगै आलिया भट्टले फिल्म खेल्न लागेको जानकारी नेटफ्लिक्सले आफ्नो आधिरकारिक ट्विटरबाट जानकारी दिएको हो।
'उत्साहजनक खबर, आलिया भट्ट गल गडोट र जेमी डोरनानसँगै नयाँ फिल्म हार्ट अफ स्टोनमा देखिनेछिन्।'
गल गडोटले यसअघि नै टम हार्परको यो फिल्मको सुटिङ भइसकेको जानकारी दिएकी थिइन्।
बलिउडका प्रियंका चोपडा र दीपिका पादुकोणपछि ठूलो ब्यानरको फिल्म खेल्न लागेकी आलियालाई अहिले धेरैले बधाइ दिएकी छन्।
फिल्म निर्माता परिवारकी सन्तानका रूपमा बेलाबेला विभिन्न आलोचना खेपे पनि उनले आफ्नो अभिनयबाट आफूलाई अब्बल सावित गरिसकेकी छन्।
'स्टुडेन्ट अफ द इयर' बाट बलिउड फिल्मको मुख्य भूमिकामा देखा परेकी आलियाले यसपछि राम्रा फिल्ममा आफ्नो दमदार प्रस्तुती दिइन्।
अहिले उनको फिल्म 'गंगुबाइ कठियावाडी' सिनेमा हलहरूमा चलिरहेको छ र प्रशंसाका साथै कमाइ पनि राम्रो गरिरहेको छ। यो फिल्म बर्लिन इन्टरनेसनल फिल्म फेस्टिभलमा प्रिमियर भएको थियो। यसअघिका उनका फिल्म 'गली ब्वाइ र 'हाइवे' पनि यो फेस्टिभलमा प्रिमियर भएका थिए। जोया अख्तरद्वारा निर्देशन गरिएको गली ब्वाइ सन् २०२० को ओस्करमा पनि पठाइएको फिल्म हो।
आलिया अब करन जोहरको 'रकी और रानी की प्रेम कहानी' मा रणवीर सिंहसँगै देखिनेछन्। त्यस्तै 'डार्लिङ्स' मा उनी देखिनेछिन् जसको सहनिर्माता आलिया आफैं हुन्।
