साउथ सुपरस्टार विजय देवरकोन्डाको नयाँ फिल्म जेजीएमको औपचारिक घोषणा भएको छ। मंगलबार मुम्बईमा एक कार्यक्रमबीच फिल्मको पोस्टर सार्वजनिक गर्दै निर्माण घोषणा गरिएको हो। सार्वजनिक पोस्टरमा विजय आर्मीको लुक्समा देखिएका छन्।
बलिउड तड्काका अनुसार उक्त कार्यक्रममा निर्देशक पुरी जगन्नाथले फिल्मको कथा बलियो रहेको बताए।
‘म आफ्नो आगामी फिल्म जेजिएमको घोषणा गर्न पाउँदा एकदमै खुसी छु। विजयसँग काम गर्न राम्रो लाग्छ। जेजिएमको कथा बलियो छ र यो एक्सन फिल्म हो,’ निर्देशक पुरीले भने।
त्यस्तै अभिनेता विजयले फिल्मप्रति उत्साहित रहेको बताए।
‘म जेजिएमलाई लिएर निकै उत्साहित छु। यस फिल्ममा आकर्षक र चुनौतीपूर्ण पटकथा छ। फिल्मको कहानीले भारतीय दर्शकको मन छुनेछ। म निर्देशक पुरीको ड्रिम प्रोजेक्टमा सहभागी हुन पाउँदा सम्मानित महसुस गरिरहेको छु। चार्ममे (कौर) र उनको टिमसँग काम गर्न उत्साहित छु। जेजिएममा मेरो भूमिका ताजा छ। मैले यस्तो भूमिका कहिल्यै गरेको छैन। यस भूमिकाले दर्शकलाई प्रभाव पार्छ भन्ने विश्वास छ,’ उनले भने।
पुरी जगन्नाथको पटकथा, संवाद तथा निर्देशन रहने फिल्मलाई चार्ममे कौर, वामशी पेडिपल्ली र निर्देशक पुरी मिलेर निर्माण गर्नेछन्। अप्रिल २०२२ मा छायांकन सुरू हुने फिल्म ३ अगस्त २०२३ मा प्रदर्शन हुनेछ।
