अमेजोन प्राइमको वेब सिरिज ‘पाताल लोक’ मा हाथीराम चौधरीको भूमिका निभाएका जयदीप अहलावत आफ्नो अभिनयले चर्चा बटुल्न सफल भए। त्यसपछि उनी लगातार राम्रो प्रोजेक्टमा देखिएका छन्। ‘पाताल लोक’ को सफलतापछि उनले दोस्रो भागको लागि आफ्नो पारिश्रमिक बढाएका छन्।
भारतीय सञ्चार माध्यम पिंकभिलाका अनुसार उनले अघिल्लो सिजनमा लिएको पारिश्रमिकको तुलनामा ५० गुणा पारिश्रमिक बढाएका छन्।
जयदीपले सन् २०२० मा प्रदर्शनमा आएको सिरिजको पहिलो सिजनमा ४० लाख भारतीय रूपैयाँ पारिश्रमिकको रूपमा लिएका थिए। दोस्रो सिजनमा भने उनको पारिश्रमिक ५० गुणाले बढेको छ। यसमा उनले २० करोड भारतीय रूपैयाँ पारिश्रमिक लिने भएका छन्।
अमेजोन प्राइमले केही दिन अगाडी एक कार्यक्रममा ओटिटीमा प्रदर्शन हुने लगभग ४१ वटा प्रोजेक्टको नाम घोषणा गरेको थियो। जसमा ‘पाताल लोक २’ पनि सामेल थियो।
अमेजोन प्राइमले अभिनेत्री अनुष्का शर्मासँग मिलेर निर्माण गरेको ‘पाताल लोक २’ बन्ने घोषणा भएसँगै जयदीपको पारिश्रमिकको विषय पनि चर्चामा आएको हो।
क्लीन स्लेट फिल्म्सको प्रोडक्सनमा निर्माण भएको ‘पाताल लोक’को दोस्रो श्रृंखला २०२३ मा रिलिज हुने बताइएको छ। सिरिजमा जयदीपसँगै इश्वक सिंह, अभिशेक बेनर्जी, स्वस्तिका मुखर्जी, निहारिका ल्यारा दत्तलगायतका कलाकारको अभिनय छ।
जयदीप अहलावत यो सिरिजसँगै फिल्म ‘एक्सन हीरो’मा पनि देखिनेछन्। उक्त फिल्ममा उनी खलनायकको भूमिकामा देखिदैछन्। भने फिल्ममा आयुष्मान खुराना मुख्य भुमिकामा छन्।
