बलिउड अभिनेता अक्षय कुमारको फिल्म 'रक्षा बन्धन'को प्रदर्शन मिति तय भएको छ।
बिहिबार एक भिडिओ सार्वजनिक गर्दै फिल्मको प्रदर्शन मिति घोषणा गरिएको हो। यो फिल्म अगस्ट ११ देखि प्रदर्शन हुने भएको छ।
अक्षय कुमारले फिल्मको माेसन पाेस्टर सार्वजनिक गर्दै लेखेका छन्, ‘तपाईंहरू सबैलाई बन्धनको रुपमा एक कहानी लिएर आउँदै छौं। जसले तपाईंलाई आफ्नै कहानी याद दिलाउँछ। रक्षा बन्धन ११ अगस्ट, २०२२ मा फिल्म हलमा प्रदर्शन हुनेछ।’
आनन्द एल रायले निर्देशन गरेको फिल्ममा अक्षय र भुमि पाडनेकरको मुख्य भूमिका छ।
रक्षा बन्धनले ११ अगस्टलाई प्रदर्शन मिति तय गरेसँगै आमिर खानको फिल्म 'लाल सिंह चड्डा'सँग भिड्ने भएको छ। अक्षयको 'रक्षा बन्धन'भन्दा अघि नै 'लाल सिंह चड्डा'ले प्रदर्शन मिति घाेषणा गरेको थियो।
'लाल सिंह चड्डा'मा आमिर खान र करिना कपूर खानको मुख्य भूमिका छ। आमिरको पछिल्लो समय 'ठग्स अफ हिन्दोस्तान' बक्स अफिसमा फ्लप भएको थियो।
त्यस्तै, अक्षयको यसै वर्ष प्रदर्शन भएको फिल्म 'बच्चन पान्डे' र 'सम्राट पृथ्वीराज' बक्स अफिसमा फ्लप भएको छ।
