बलिउड अभिनेत्री आलिया भट्टको फिल्म 'डार्लिङ्स'को ट्रेलर सार्वजनिक भएको छ।
सार्वजनिक ट्रेलरमा आलिया आफ्नो श्रीमान् हराएको उजुरी दिन प्रहरी कार्यालय पुग्छिन् तर उनले आमासँग मिलेर श्रीमानलाई घरमै कैद गरेर राखेकी हुन्छिन्। फिल्ममा आलिया श्रीमानको अत्याचार विरूद्ध आवाज उठाउने पात्रको रूपमा देखिएकी छन्।
डार्क कमेडी फिल्ममा आलिया भट्टसँगै शेफाली शाह, विजय वर्मा र रोशन म्याथ्युलगायत कलाकारको अभिनय छ।
फिल्मलाई शाहरूख खानको रेड चिली प्रोडक्सन हाउस र आलियाको सनशाइन प्रोडक्सन हाउसले मिलेर निर्माण गरेका हुन्। यही फिल्मबाट आलियाले निर्माताको रुपमा डेब्यू गरेकी छन्। आलियाले निर्माणमा गौरी खान र गौरव वर्मासँग सहकार्य गरेकी छन्।
जसमित के रीनले निर्देशन गरेको फिल्मको लेखन जसमित र परवेज शेखले गरेका हुन्। यो फिल्म अगस्ट ५ मा नेटफ्लिक्समा प्रदर्शन हुँदैछ।
आलिया भट्ट ‘ब्रह्मास्त्र’मा पनि देखिँदै छिन्। आयान मुखर्जीद्वारा निर्देशित फिल्ममा आलियासँगै रणवीर कपूर, अमिताभ बच्चन, अक्किनेनी नागार्जुन र मोनी रोयको मुख्य भूमिका छ। यो फिल्म आउँदो सेप्टेम्बर ९ तारिखमा विश्वभर एकसाथ प्रदर्शन हुनेछ।
