दक्षिण भारतीय अभिनेता चिरञ्जीवी र बलिउड अभिनेता सलमान खान अभिनित फिल्म 'गड फादर'को टिजर सार्वजनिक भएको छ।
दक्षिण भारतीय अभिनेता चिरञ्जीवीकाे जन्मदिनकाे अवसर पारेर साेमबार टिजर सार्वजनिक गरिएकाे हाे।
सार्वजनिक टिजरमा चिरञ्जीवीलाई गड फादरको रूपमा प्रस्तुत गरिएको छ। २० वर्षसम्म लुकेर बसेका गड फादर कहाँ थिए कसैलाई थाहा हुँदैन तर उनी ६ वर्ष पहिला नै फर्किएर आउँछन्। राजनेताहरू उनलाई मार्न चाहन्छन्, पुलिस उनलाई पक्राउ गर्न चाहन्छन् तर उनले सलमान खानको समर्थन पाउँछन्।
यो मलयालम फिल्म 'लुसिफर'को रिमेक हो। फिल्ममा रामचरण, आरबी चाैधरी र एनभी प्रसादकाे लगानी रहेकाे छ।
मोहन राजाले निर्देशन गरेको फिल्ममा चिरञ्जीवी र सलमानसँगै नयनतारा, सत्यदेव कन्चरणलगायत कलाकारको अभिनय छ। यो फिल्ममार्फत सलमान तेलुगु फिल्ममा डेब्यू गर्दैछन्।
यो फिल्म अक्टाेबर ५ अर्थात् असोज १९ गतेदेखि प्रदर्शन हुँदैछ।
