नवाजुद्दीन सिद्दीकीको आगामी फिल्म 'हड्डी'को घोषणा गरिएको छ।
मंगलबार निर्माण टिमले मोसन पोस्टर सार्वजनिक गर्दै औपचारिक निर्माण घोषणा गरेका हुन्। फिल्ममा नवाजुद्दीन पारलैंगिक महिलाको भूमिकामा देखिएका छन्।
सार्वजनिक पोस्टरमा उनी गाउन लगाएर बसेका छन्। उनको हातमा रगत लागेको छ भने सोफा नजिकै एक रड देख्न सकिन्छ।
'यो फिल्मले मलाई नवाजुद्दीनसँग काम गर्न मौका दियो। यो मोसन पोस्टरले दर्शकलाई फिल्मप्रति आकर्षित गर्छ भन्ने आशा छ,' लेखक तथा निर्देशक अक्षत अजय शर्माले भने।
त्यस्तै नवाजुद्दीन भन्छन्, 'मैले विभिन्न रोचक पात्रहरूको भूमिका निवार्ह गरेको छु तर हड्डी एक अद्भुत र विशेष हुनेछ। यो फिल्ममा कहिल्यै नदेखिएको लुक्समा देखिदै छु। यो फिल्मले अर्काे खुड्किलो पार गर्न सहयोग गर्छ भन्ने आशा छ।'
मोसन पोस्टर सार्वजनिक भएपछि दर्शकहरूले अर्चना पूरण सिंहको झल्को दिएको बताएका छन्। फिल्ममा जी स्टुडिओ र आनन्दिता स्टुडिओको लगानी छ।
भारतीय सञ्चार माध्यमका अनुसार यो फिल्म २०२३ मा प्रदर्शन हुनेछ।
