अभिनेता सञ्जय दत्त बलिउडका चर्चित अभिनेता हुन्। यसै वर्ष प्रदर्शन भएको दक्षिण भारतीय फिल्म 'केजिएफ २'मा भिलेन अधीराको भूमिका निर्वाह गरेपछि उनको चर्चा थप चुलिएको थियो।
उनै अभिनेता अर्काे दक्षिण भारतीय फिल्ममा पनि देखिने भएका छन्। उनी थालापथी विजयको अनटाइल फिल्ममा देखिने भएका हुन्।
यो फिल्मलाई लोकेश कनागराजले निर्देशन गर्नेछन्। उनले सञ्जयलाई ग्याङस्टार फिल्मको प्रस्ताव राखेका हुन्।
भारतीय सञ्चारमाध्यमका अनुसार सञ्जय फिल्ममा भिलेनकै भूमिकामा देखिनेछन्।
यो फिल्ममा काम गर्न सञ्जयले १० करोड भारतीय रुपैयाँ पारिश्रमिक तोकेका छन्। यो फिल्मको छायांकन यसै वर्षको अक्टोबर वा नोभेम्बरमा सुरु हुनेछ। यो फिल्म २०२३ मा दीपावलीको अवसरमा प्रदर्शन हुने बताइएको छ।
यस वर्ष सञ्जयका ३ फिल्म 'केजीएफ २, सम्राट पृथ्वीराज र शमशेरा' प्रदर्शन भयो। तर 'केजीएफ २' बाहेक अन्य दुई फिल्म बक्स अफिसमा असफल भए।
पछिल्लो समय सञ्जयलाई भिलेनकै भूमिका निर्वाह प्रस्ताव आइरहेको छ। उनी आगामी फिल्म 'द गुड महराज र घुरछडी'को छायांकनमा व्यस्त छन्।
त्यस्तै दक्षिण भारतीय अभिनेता थलापथी विजय आगामी फिल्म 'वरिसु'मा देखिदैछन्। उनको पछिल्लो समय प्रदर्शन भएको फिल्म 'बिस्ट' बक्स अफिसमा असफल सावित भएको थियो।
