सुरज वर्जत्यले निर्देशन गर्ने प्राय फिल्ममा सलमान खान छुट्दैनन्। उनीहरूले सहकार्य गरेका फिल्मले बक्स अफिसमा राम्रो व्यापार गरेका छन्।
तर सुरजको आगामी फिल्म ‘उचाई’मा सलमान छैनन्। भारतीय सञ्चारमाध्यम दैनिक जागरणका अनुसार सलमान यो फिल्म गर्न चाहन्थे। सगरमाथा चढ्न उनको रुचि थियो।
सलमानलाई यो फिल्ममा किन नराखेको भन्ने बारे निर्देशक सुरजले खुलासा गरेका छन्।
'उचाई' एक पारिवारीक फिल्म हो। तर यो फिल्मको कहानी एक परिवारको नभई चार जना साथीको कथामा आधारित छ।
यो फिल्म बनाउनुअघि सलमानले सुरजलाई कुन फिल्म बनाउँदैछौं भनेर सोधेका थिए। सगरमाथा जाने भन्ने बित्तिकै सलमान उत्साहित भए। उनले आफूले यो फिल्म गर्न सक्ने बताए।
फिल्मको कथाअनुसार फिल्ममा सलमान फिट नहुने बताउँदै सुरजले सलमानको प्रस्तावलाई अस्वीकार गरे।
‘सलमान सगरमाथा चढ्न सक्छन्। तर मलाई यस्तो मान्छे चाहिएको थियो जसलाई देखेर दर्शकलाई लागोस् कि यिनीहरू यो काम गर्न सक्दैनन्,’ उनले भने।
सुरजले सलमान खान अभिनीत फिल्म ‘मेने प्यार किया’ बाट फिल्म निर्देशनमा डेब्यु गरेका थिए जुन सुपरहिट भयो। त्यसपछि उनीहरूले ‘हम आपके है कोन, हम साथ साथ हे, प्रेम रतन धन पायो’ जस्ता फिल्ममा सहकार्य गरेका छन्।
'उचाई' मा एक साथीको निधन भएपछि अन्य तीन साथीहरू उसको अन्तिम इच्छा पूरा गर्न सगरमाथा चढ्छन्।
फिल्ममा अमिताभ बच्चन, बोमन इरानी, अनुपम खेर, डेनी डेन्जोङ्पा,परिणिती चोपडा, नीना गुप्ता र सारिका हसनको मुख्य भूमिका छ। फिल्ममा नेपाली कलाकारले पनि अभिनय गरेका छन्।
नेपालमा ६० प्रतिशत छायांकन गरिएको फिल्म आगामी कात्तिक २५ गतेदेखि प्रदर्शन हुँदैछ।
