दिवंगत बलिउड अभिनेता इरफान खानका छोरा बाबिल खान बलिउडमा डेब्यु गर्दैछन्।
उनी अभिनीत फिल्म ‘काला’ को ट्रेलर सार्वजनिक भएको छ।
मंगलबार मुम्बईमा एक कार्यक्रम गर्दै फिल्मको ट्रेलर सार्वजनिक गरिएको हो। सार्वजनिक ट्रेलरमा एक गायिका र उनकी आमाबीचको सम्बन्धलाई देखाइएको छ। यसमा बाबिल खानको भूमिकाले कहानीमा छुट्टै मोड ल्याउँछ।
यो फिल्म १९४० दशकको कलकत्ताको पृष्ठभूमि देखाइएको छ। फिल्ममा बाबिलसँगै तृप्ति डिमरी, अमित सियाल, वरुण ग्रोवरलगायत कलाकारको अभिनय छ।
यो फिल्म १ डिसेम्बर नेटफ्लिक्समा रिलिज हुनेछ।
दुई वर्षअघि अभिनेता इरफान खानको निधन भएको थियो।
जयपुर राजस्थानमा सन् १९६६ मा जन्मिएका खान थिएटरबाट फिल्ममा प्रवेश गरेका थिए। उनको अन्तिम फिल्म ‘अंग्रेजी मिडियम’ हो।
खानले ‘सलाम बम्बे, मक्बुल, पानसिंङ तोमार, द लञ्च बक्स, पिकु, तलबार, हिन्दी मिडियम’ जस्ता चर्चित फिल्ममा अभिनय गरेका थिए।
उनले बलिउड मात्र होइन ‘स्लमडग मिलिनियर्स, जुरासिक वर्ल्ड, द अमेजिङ स्पाइडर म्यान र लाइफ अफ पाई’ जस्ता अन्तर्राष्ट्रिय ब्लकबस्टर फिल्ममा काम गरेका थिए।
