प्रतिनिधि सभा तथा प्रदेश सभा निर्वाचन नजिकिएसँगै नयाँ नेपाली फिल्म प्रदर्शनमा आएका छैनन्। आज शुक्रबार नेपाली हलमा बलिउड फिल्म 'दृश्यम २' प्रदर्शनमा आएको छ।
यो फिल्मले नेपाली हलमा सोलो रिलिजको अवसर पाएको छ। फिल्मलाई मल्टिप्लेक्स हलमा उच्च शो दिइएको छ। जसमध्ये लगभग ५० प्रतिशत शोहरू सोल्डआउट भइसकेका छन्।
यो फिल्म सन् २०१५ मा रिलिज भएको ‘दृश्यम’ को सिक्वेल हो। दृश्यमको पहिलो भागमा एक परिवार एकअर्काको सुरक्षाको लागि कुन हदसम्म जान सक्छन् भन्ने देखाइएको थियो। ‘दृश्यम २’ मा पहिलो भागकै कहानीलाई निरन्तरता दिइएको छ।
विजय सालगांवकर र उनको परिवारसँग सम्बन्धित मुद्दा बन्द भएको ७ वर्षपछि पुनः खोलिएको छ।
अभिषेक पाठकले निर्देशन गरेको फिल्ममा अजयसँगै अक्षय खन्ना, तब्बु, श्रीया सरन, इशिता दत्त, मृणाल जाधव, रजत कपूरलगायत कलाकारको अभिनय छ।
सुधिरकुमार चौधरीले छायांकन गरेको फिल्मलाई सन्दीप फ्रान्सीले सम्पादन गरेका हुन्। फिल्ममा भुषण कुमार र कृष्ण कुमारको लगानी छ।
सन् २०१५ मा प्रदर्शन भएको बलिउड फिल्म ‘दृश्यम’लाई दर्शकले निकै रुचाएका थिए।
