बलिउड अभिनेता सलमान खानकी भान्जी अलिजेह अग्निहोत्री बलिउडमा डेब्यु गर्दैछिन्।
भारतीय सञ्चारमाध्यम बलिउड लाइफका अनुसार स्टार किड राष्ट्रिय विजेता सौमेन्द्र पढीको फिल्मबाट उनले डेब्यु गर्न लागेकी हुन्।
अलिजेहले फिल्मको छायांकन सुरु गरिसकेकी छन्। उनी विगत दुई वर्षदेखि नृत्य र गायनको प्रशिक्षण लिइरहेकी थिइन्।
उक्त फिल्मको नाम सार्वजनिक गरिएको छैन। यो फिल्म २०२३ मा रिलिज हुने बताइएको छ।
उनी सलमानकी बहिनी अलविरा खान अग्निहोत्री र अभिनेता तथा निर्माता अतुल अग्निहोत्रीको छोरी हुन्। उनी २२ वर्षको भइन्।
सन् २०१९ मा नै अलिजेहले सलमानको फिल्म ‘दबंग ३’ बाट डेब्यु गर्न लागेको चर्चा थियो।
यसबारे उनका बुवा अतुलले भनेका थिए, ‘यसबारे कुरा गर्न मलाई पनि हतार छ। बुवाको रुपमा मेरो एउटा चाहना छ कि उनी रमाइलो मान्दै फिल्ममा आफ्नो उत्कृष्ट काम दिऊन्। मेरा छोराछोरीले आफ्नो परिवारलाई फिल्म व्यवसायको रुपमा देखेका छन्। हाम्रा उतार-चढावहरू देखेका छन्। मलाई आशा छ उनीहरू यसलाई अझै राम्रोसँग अगाडि बढाउने छन्।’
