बलिउड अभिनेता अजय देवगनको फिल्म ‘दृश्यम २’ ले बक्स अफिसमा राम्रो कमाइ गरिरहेको छ।
यो फिल्मले दुई सातामा १६३ करोड ४८ लाख भारु कमाएको छ। ‘दृश्यम २’ को सफलतापछि अजय रोहित शेट्टीको फिल्ममा देखिनेछन्।
शुक्रबार भारतीय बजार विश्लेषक तरण आदर्शका अनुसार रोहित शेट्टी ‘सिंघम अगेन’ निर्देशन गर्दैछन्।
उनले सामाजिक सञ्जालमार्फत फिल्म बारे जानकारी दिएका हुन्।
‘अजय देवगन र रोहित शेट्टी ‘सिंघम अगेन’ बाट एकसाथ आउँदैछन्। यो ठूलो खबर हो। उनीहरू दुवै सफल कलाकार र निर्देशकको रुपमा परिचित छन्। फिल्मको नाम सिंघम अगने नै हुनेछ,’ उनले लेखेका छन्।
दक्षिण भारतीय फिल्म ‘कैथी’ को हिन्दी रिमेक ‘भोला’ को छायांकन सकिएपछि अजय ‘सिंघम अगेन’ को छायांकनमा व्यस्त हुनेछन्।
यो फिल्ममा अजयसँग कुन अभिनेत्री देखिँदैछिन भनेर जानकारी दिइएको छैन।
‘सिंघम’ सन् २०११ मा प्रदर्शन भएको थियो। फिल्ममा अजयसँगै काजल अग्रवालको मुख्य भूमिका थियो। यो फिल्म सन् २०१० मा आएको तमिल फिल्म ‘सिंघम’ को हिन्दी रिमेक हो।
२०१४ मा सिंघम रिटर्न्स प्रदर्शन भएको थियो। फिल्ममा अजयसँगै करीना कपूर खानको मुख्य भूमिका थियो।
रोहित शेट्टीले नै ‘सिंघम’ र ‘सिंघम रिटर्न्स’को निर्देशन गरेका थिए।
