बलिउड अभिनेत्री कट्रिना कैफ सन् २०२२ मा गुगलमा सबभन्दा धेरै खोजिएकी एसियाली अभिनेत्री बनेकी छन्।
हालै गुगलमा खोजिएको एसियाका १०० जनाको नाम सार्वजनिक गरिएको हो। उक्त सूचीको सातौं नम्बरमा कट्रिना छिन्।
कट्रिना बलिउडमा धेरै रूचाइने अभिनेत्री हुन्। आफ्नो अभिनय करियर सुस्त रूपमा चले पनि मेहनत र लगनशीलताले उनले बलिउडमा आफ्नो स्थान बनाएकी छन्।
पछिल्लो समय ‘फोन भूत’ मा देखिएकी कट्रिना सलमान खानसँग फिल्म ‘टाइगर ३’ र विजय सेतुपतिसँग ‘मेरी क्रिसमस’ मा देखिने छिन्।
उनलाई लिएर निर्देशक अली अब्बास जफर महिला सुपरहिरो फिल्म बनाउने योजनामा छन्।
उनलाई बलिउड अभिनेत्री आलिया भट्टले पछ्याएकी छन्। यस सूचीमा आलिया भट्ट आठौं स्थानमा छिन्। उनको यसवर्ष ‘गंगुबाई काठियावाडी निकै हिट भयो। त्यस्तै उनी अभिनीत फिल्म ‘डार्लिङ’ नेटफ्लिक्समा निकै रूचाइएको थियो।
नौ स्थानमा बलिउड तथा हलिउड अभिनेत्री प्रियंका चोपडा छिन् भने दशौं स्थानमा भारतीय क्रिकेट कप्तान विराट कोहली छन्। उक्त सूचीमा पर्ने उनी एक मात्र भारतीय खेलाडी हुन्।
सूचीमा शीर्ष स्थानमा किम तेह्युङ ‘भि’ छन् भने दोस्रो स्थानमा बिटिएसका गायक जंगकुक छन्। उनीहरू दुवै सामाजिक सञ्जालमा चर्चामा छन्। किम सामाजिक सञ्जालमा भाइरल भइरहन्छ भने जंगकुकले फिफा विश्वकप २०२२ को उद्धघाटनमा प्रस्तुति दिएका थिए।
