बलिउड अभिनेता शाहरूख खान र दीपिका पादुकोण अभिनीत फिल्म 'पठान' को दोस्रो गीत 'झूमे जो पठान' ले नयाँ रेकर्ड राखेको छ।
‘पठान’ को दोस्रो गीतले सार्वजनिक भएको २४ घण्टा नबित्दै १९ मिलियन भ्युज पाएको छ। ‘बेसरम रंग’ गीत विवादपछि फिल्मको नयाँ गीतले छाेटो समयमा धेरै भ्युज पाउने रेकर्ड राखेकाे हाे।
अरिजीत सिंह, विशाल ददलानी, शेखर रविजियानी र सुकृति कक्करको स्वर रहेको गीतमा कुमारको शब्द छ भने विशाल र शेखरले संगीत भरेका छन्।
बोस्को क्याइसरले कोरियोग्राफी गरेको गीतमा अभिनेता शाहरूख र दीपिका फिचर्ड छन्।
‘पठान’ को पहिलो गीत ‘बेसरम रंग’ १२ डिसेम्बरमा सार्वजनिक गरिएको थियो। गीत सार्वजनिक गरेसँगै विवादमा फसेको थियाे।
उक्त गीतमा अभिनेत्री दीपिका पादुकोणको पहिरन र पहिरनको रंगले हिन्दु धर्मको अपमान गरेको भन्दै आपत्ति जनाइएको हो।
सिद्धार्थ आनन्दले निर्देशन गरेको फिल्ममा शाहरूख र दीपिकासँगै जोन अब्राहमको पनि मुख्य भूमिका छ। यो फिल्म २५ जनवरीदेखि प्रदर्शन हुँदैछ।
