बलिउड अभिनेता रणवीर सिंह अभिनीत फिल्म 'सर्कस' गत शुक्रबारदेखि प्रदर्शन भइरहेको छ।
भारतीय सञ्चार माध्यम दैनिक जागरणका अनुसार फिल्मले बक्स अफिसमा कमजोर व्यापार गरिरहेको छ। ७ करोड ७५ लाख भारुको ओपनिङ गरेको फिल्मले दोस्रो दिन ६ करोड ५० लाख भारु कमाएको छ।
दुई दिनमा फिल्मले १४ करोड ५० लाख कमाएको छ। ज्याकलिन फर्नाडिज, पूजा हेगडे, संजय मिश्रासँग रणवीर सिंहको दोहोरो भूमिका हुँदा पनि फिल्मले राम्रो प्रदर्शन गर्न सकेन।
भारतीय हलमा यतिबेला हलिउड फिल्म ‘अवतार २’ को दबदबा छ।
पिरियड कमेडी ड्रामा फिल्ममा रणवीर सिंह, पूजा हेग्डे, ज्याक्लीन फर्नान्डेज, जोनी लिवर, संजय मिश्र, वरुण शर्मा, सिद्धार्थ जाधव, मुकेश तिवारी, सुलभा आर्या, अश्विनी कल्सेकरलगायत कलाकारको अभिनय छ। फिल्ममा रणवीरसँग दीपिका पादुकोणको नृत्य पनि रहेको छ।
रणवीरको पछिल्लो फिल्म ‘जयेशभाई जोरदार’ ले पनि बक्स अफिसमा कमजोर व्यापार गरेको थियो तर निर्देशक रोहित शेट्टीको पछिल्लो फिल्म ‘सूर्यवंशी’ हिट भएको थियो।
निर्देशक रोहित र अभिनेता रणवीरले ‘सिम्बा’ मा एकसाथ काम गरेका थिए।
