बलिउड अभिनेता शाहरूख खान र दीपिका पादुकोण अभिनीत फिल्म 'पठान' को ट्रेलर बुर्ज खलिफामा देखाइएको छ।
भारतीय सञ्चारमाध्यम दैनिक जागरणका अनुसार शनिबार बुर्ज खलिफामा फिल्मको ट्रेलर देखाइएको हो। उक्त अवसरमा शाहरूख खान र निर्देशक सिद्धार्थ आनन्द उपस्थित थिए।
शाहरूखले फिल्मको ट्रेलरमा समावेश डाइलग ‘पठानको घरमा पार्टी राखेपछि अतिथि सत्कारको लागि पठान आउँछ र साथमा पटाका पनि आउँछ’ सुनाएका थिए। योसँगै उनले ‘पठान’ को शीर्ष गीतको हुक-स्टेप्स पनि गरेका थिए।
दुबईमा भएको कार्यक्रमको तस्बिर र भिडिओ सामाजिक सञ्जालमा भाइरल भइरहेको छ।
सिद्धार्थ आनन्दले निर्देशन गरेको फिल्म ‘पठान’मा शाहरूख र दीपिका पादुकोणसँगै जोन अब्राहमको पनि मुख्य भूमिका छ। यस फिल्ममार्फत शाहरूख खान पाँच वर्षपछि कमब्याक गर्दैछन्।
यो यशराज फिल्म्सको चौथो स्पाई युनिभर्सको फिल्म हो। यशराज फिल्म्स ब्यानरबाट बनेका एक था टाइगर, टाइगर जिन्दा है र वार स्पाई युनिभर्सका फिल्म हुन्। यस युनिभर्समा बन्ने फिल्म सबै जासुसीमा आधारित हुनेछ।
‘पठान’ पछि स्पाई युनिभर्सको आगामी फिल्म ऋतिक रोशनको ‘फाइटर’ हुने बताइएको छ। बलिउडमा रोहित शेट्टीको कप युनिभर्स चर्चित छ। उनको सिंघम, सिंघम रिटर्न्स, सिम्बा र सूर्यवंशी उक्त युनिभर्सका फिल्म हुन्।
हिन्दी, तमिल र तेलुगु भाषामा फिल्म जनावरी २५ देखि प्रदर्शन हुँदैछ।
