दक्षिण भारतीय अभिनेत्री सामन्था रूथ प्रभुले फिल्म 'पुष्पा २' को प्रस्ताव अस्वीकार गरेकी छन्।
भारतीय सञ्चारमाध्यम बलिउड लाइफका अनुसार उनले ‘पुष्पा २’ मा समावेश हुने आइटम गीतको प्रस्ताव अस्वीकार गरेकी हुन्।
उनले अल्लु अर्जुन र रश्मिका मन्दना अभिनीत फिल्म ‘पुष्पा’ मा ‘उ अन्टावा’ नृत्य गरेकी थिइन्। ‘पुष्पा’ को एउटा आइटम गीतको लागि उनले ५ करोड भारतीय रूपैयाँ पारिश्रमिक लिएकी थिइन्।
यो आइटम गीतपछि उनको सर्वाधिक चर्चा भयो। उनले एक अन्तर्वार्तामा दर्शकहरूले आफ्नो पहिलाको काम बिर्सिएर गीतको मात्रै चर्चा गरेको बताएकी थिइन्। गीतको सफलतामा उनी खुशी थिइन्।
यसै चर्चाको कारण निर्देशक सुकुमारले उनलाई आइटम गीतको प्रस्ताव गरेका थिए। भारतीय सञ्चार माध्यमका अनुसार उनले आफ्नो रोगका कारण फिल्मको प्रस्ताव अस्वीकार गरिरहेकी छन्।
सामन्थाका अनुसार उनलाई ‘मायोसाइटिस’ भन्ने रोग लागेको हो। यो रोगमा शरीर कमजोर हुने र मांसपेसीहरू दुख्ने हुन्छ। गम्भीर अवस्थामा मानिसलाई उभिन र हिँड्न समेत गाह्रो हुन्छ।
डाक्टरहरूले उनको रोग पूर्ण रूपमा निको हुने बताएका छन्। हाल सामन्था आफ्नो आगामी वेब सिरिज ‘सिटाडेल’ को छायांकनमा व्यस्त छन्।
उनी फिल्म ‘खुशी’ को छायांकन पूरा गर्न चाहन्छिन्। यस फिल्ममा उनीसँगै विजय देवरकोन्डाको मुख्य भूमिका छ। यो फिल्म उनले पहिले नै साइन गरेकी थिइन्।
उनको पछिल्लो समय रिलिज भएको फिल्म ‘यशोदा’ ले बक्स अफिसमा राम्रो व्यापार गरेको थियो।
