राज निदिमोरू र कृष्ण डिके निर्देशित वेब सिरिज 'फर्जी' प्राइम भिडिओमा १० फेब्रुअरीमा रिलिज भएको थियो। यस वेब सिरिजलाई दर्शकले रूचाइरहेका छन्।
बलिउड अभिनेता शाहिद कपूरले 'फर्जी' मार्फत वेब सिरिजमा डेब्यू गरेका छन्। उनीसँगै दक्षिण भारतीय अभिनेता विजय सेतुपतिले पनि ओटिटीमा डेब्यू गरेका हुन्।
यो सिरिजले भारतमा मात्र नभई विश्वभरबाट चर्चा बटुलिरहेको छ। यो सिरिजले केही देशमा टप १० को सूचीमा सामेल भएको छ। उक्त जानकारी शाहिदले इन्स्टाग्राममार्फत दिएका हुन्।
यो सिरिज अमेरिका, अष्ट्रेलिया, युके, क्यानडा, सिंगापुर र यूएईमा टप १० को सूचीमा आएको हो।
यस सिरिजबाट अभिनेता शाहिदले महँगो पारिश्रमिक लिएका छन्। भारतीय सञ्चारमाध्यमका अनुसार शाहिदले ३० करोड भारू लिएका हुन्।
यसै सिरिजबाट ओटिटीमा डेब्यू गरेका अभिनेता विजय सेतुपतिको पारिश्रमिक शाहिदको भन्दा निकै कम छ। उनले ‘फर्जी’ बाट ७ करोड भारू पारिश्रमिक लिएका छन्।
विजय शाहरूख खानको आगामी फिल्म ‘जवान’ मा देखिनेछन्।
‘फर्जी’ एक क्राइम थ्रिलर ड्रामा हो। ८ एपिसोडको वेब सिरिजमा शाहिद र विजयसँगै केके मेनन, अमोल पालेकर र राशि खन्नालगायतको अभिनय छ।
