बलिउडका चर्चित सिक्वेल फिल्म मध्ये एक हो 'हेरा फेरी'। 'हेरा फेरी' को पहिलो भाग सन् २००० मा प्रदर्शन भएको थियो भने सन् २००६ मा यसको दोस्रो भाग 'फिर हेरा फेरी' प्रदर्शन भयो।
दुवै संस्करणमा अक्षय कुमार, परेश रावल र सुनील शेट्टीलाई दर्शकले निकै मन पराए। लामो समयदेखि दर्शक यसको तेस्रो भागको पर्खाइमा छन्। केही समयअघि फिल्ममा अक्षयको ठाउँमा कार्तिक आर्यन देखिने चर्चा थियो।
सामाजिक सञ्जालमा ‘नो अक्षय, नो हेरा फेरी’ अभियान चलेपछि निर्माताले अक्षयलाई लिएर फिल्मको छायांकन सुरू गरिसकेका छन्।
यसैबीच फिल्ममा सञ्जय दत्त अनुबन्ध भएको खबर बाहिरिएको छ। भारतीय सञ्चारमाध्यम बलिउड हंगामाका अनुसार फिल्ममा सञ्जय दृष्टिविहीन खलनायकको भूमिकामा देखिनेछन्।
'सञ्जय दत्त कमेडीमा शानदार छन्। हेरा फेरीका निर्मातालाई भिलेनको भूमिकामा सञ्जय उचित व्यक्ति हुन् जस्तो लाग्छ। हेरा फेरीको दुनियाँमा उनी जोडिएसँगै उत्साह बढेको छ। राजु, श्याम र बाबुरावसँग सञ्जयको भिडन्त हर्ने दर्शकको लागि रोचक हुनेछ,' बलिउड हंगामाका स्रोतले भने।
यो फिल्मकाे नाम 'हेरा फेरी ३' को ठाउँमा 'हेरा फेरी ४' राखिएको छ।
पहिला फिल्मलाई अनिस बज्मीले निर्देशन गर्ने बताइएको थियो। अब फिल्मलाई फरहाद सामजी निर्देशन गर्दैछन्।
