बलिउड अभिनेता रणवीर कपूर र श्रद्धा कपूर अभिनीत फिल्म 'तू झुठी मैं मक्कार' बुधबारदेखि प्रदर्शनमा आएको छ।
फिल्मले भारतीय बक्स अफिसमा राम्रो कमाइ गर्नुको साथै सकारात्मक प्रतिक्रिया पाइरहेको छ। दर्शकले फिल्ममा रणवीर र श्रद्धा कपूरको जोडीलाई रूचाइरहेका छन्।
हिन्दी फिल्म विश्लेषक तरण आदर्शका अनुसार फिल्मले पहिलो दिन १५ करोड ७३ लाख भारू कमाएको छ। उनले ट्विट गर्दै उक्त जानकारी दिएका हुन्।
फिल्ममा एक झुठी प्रेमिका र चलाख प्रेमीको प्रेमद्वन्द्वको कथा देखाइएको छ। उनीहरू एकअर्कालाई जालमा फसाउन संघर्षरत छन्।
लभ रन्जनले निर्देशन गरेको फिल्ममा रणवीर र श्रद्धासँगै डिम्पल कपाडिया, बोनी कपूर, अनुभव सिंह बस्सीलगायत कलाकारको अभिनय छ।
रोमान्टिक कमेडी जनराको फिल्म लभ फिल्म्स ब्यानर र टी-सिरिजको सहकार्यमा बनेको हो।
‘तू झुठी मैं मक्कार’ रणवीर कपूरको अन्तिम रोमान्टिक कमेडी फिल्म हो। रणवीर प्रायः चक्लेटी हिरोको रूपमा देखिन्छन् तर केही समयअघि रणवीरले लभ रञ्जनको फिल्म आफ्नो अन्तिम रोमकम फिल्म हुने बताएका थिए।
यो फिल्मपछि उनी सन्दिप रेड्डी वांगाको फिल्म ‘एनिमल’ मा देखिनेछन्। फिल्ममा उनीसँगै रश्मिका मन्दनाको मुख्य भूमिका रहनेछ।
