दक्षिण भारतीय अभिनेता जुनियर एनटिआर फिल्म 'आरआरआर' को गीत 'नाटू नाटू' ले अस्कर अवार्ड जितेपछि चर्चामा छन्।
यसैबीच उनले ‘म फिल्ममा काम गर्न छोड्दिन्छु’ भन्दै दिएको अभिव्यक्ति भाइरल भइरहेको छ। हैदराबादमा विश्वक सेनको फिल्म ‘का धमकी’ को एक कार्यक्रममा उनले उक्त अभिव्यक्ति दिएका हुन्।
एक फ्यानले उनलाई सोधे, ‘तपाईंको आगामी फिल्म कुन हो?’
यसको जवाफमा एनटिआरले भने, ‘म कुनै फिल्ममा काम गरिरहेको छैन। यदि तपाईंले मलाई धेरै पटक यही प्रश्न गरिरहनु भयो भने म फिल्ममा काम गर्न छोड्दिन्छु।’
उनको जवाफ सुनेर कार्यक्रममा उपस्थित सबै अचम्मित भएका थिए। केही समयमै एनटिआरले अहिले नै फिल्ममा काम गर्न छोड्ने सोच नभएको बताए।
जुनियर एनटिआर आगामी फिल्म ‘एनटिआर ३०’ मा देखिनेछन्। कोरातला शिवाले निर्देशन गर्ने फिल्ममा जान्ह्वी कपूरको पनि मुख्य भूमिका रहनेछ। यो जान्ह्वीको पहिलो तेलुगु फिल्म हो। यो फिल्म सन् २०२४ अप्रिल ५ देखि प्रदर्शन हुनेछ।
